Казанлыларга Җир һәм милек мөнәсәбәтләре комитетының 17 муниципаль хезмәте электрон форматта күрсәтелә

Киләчәктә 6 муниципаль хезмәт күрсәтүне тагы электрон форматка күчерү күздә тотыла.

(Казан шәһәре KZN.RU, 13-нче июль, Алена Мирошниченко). Казанлыларга Җир һәм милек мөнәсәбәтләре комитетының 17 муниципаль хезмәте электрон форматта күрсәтелә. Беренче яртыеллыкта мондый мөмкинлектән шәһәр халкы 1293 тапкыр файдаланган. Бу хакта бүген коронавирус инфекциясе таралуга каршы тору буенча штаб утырышында Җир һәм милек мөнәсәбәтләре комитеты рәисе Ренат Галәветдинов хәбәр итте. Ул билгеләп үткәнчә, киләчәктә 6 муниципаль хезмәт күрсәтүне тагы электрон форматка күчерү күздә тотыла.

Комитетка карау өчен килгән мөрәҗәгатьләр саны берничә ел дәвамында тотрыклы югары булып кала бирә. Гражданнарны еш кына объектлар астындагы җир участокларына документлар рәсмиләштерү, җир участокларыннан файдалануга рөхсәт бирү кызыксындыра.

Казан Башкарма комитетының җир участокларына хокукларны рәсмиләштерү турындагы карарларының барлык проектларын килештерү электрон форматка күчерелгән. Бу вакытны берничә мәртәбә кыскартырга мөмкинлек бирде, дип хәбәр итте Р.Галәветдинов. Элегрәк килешү электрон рәвештә дә, кәгазьдә дә башкарылган. «Моннан тыш, сроклар проектны килештерү кәгазен максималь кыскарту хисабына киметелде - 15-тән 9-га кадәр. Нәтиҗәдә, күпчелек хезмәтләр буенча күрсәтү вакыты ике тапкыр, ә Казан Башкарма комитеты карары белән алдан килешенгән җир участогын бирү буенча - 8 тапкыр, дүрт айдан ике атнага кадәр кимеде», - дип аңлатты спикер.

Моннан тыш, 2019 елда муниципаль учреждениеләргә беркетелгән муниципаль мөлкәтне түләүсез файдалануга бирү процессы оптимальләштерелгән. Агымдагы елның 1-нче июленнән килешүләр электрон рәвештә генә имзалана.

2019 елның августыннан милеккә сату һәм муниципаль милекне арендага бирү буенча аукцион сәүдә ТР Дәүләт заказы агентлыгы электрон мәйданчыгында уздырыла.