Яңалыклар
13.08.2020, 14:20
Казанлылар балалар хосписында һәм Республика балалар клиник хастаханәсе онкобүлекләрендә ятучы балаларга мәктәп җыелмалары бүләк итә ала
Белем көнендә балалар өчен бәйрәм оештырылачак, анда канцелярия кирәк-яраклары тапшырылачак.
(Казан шәһәре KZN.RU, 13-нче август). Казанлылар хәйрия акциясендә катнаша һәм балалар хосписында һәм Республика балалар клиник хастаханәсе онкобүлекләрендә ятучы балаларга мәктәп җыелмалары бүләк итә ала.
«Кызганычка каршы, безнең тәрбияләнүчеләрнең күбесе сәламәтлек торышы аркасында мәктәпкә бара алмаячак, әмма без аларны бәйрәмнән мәхрүм итә алмыйбыз, 1-нче сентябрьдә аларның кулларында төп мәктәп атрибутлары - портфельләр, каләмнәр, дәфтәрләр, бозгычлар һәм башка кирәк-яраклар булуын телибез», - дип сөйләделәр Анжела Вавилова исемендәге Фонд матбугат хезмәтендә. Белем көне уңаеннан балалар өчен аниматорлар һәм тамашалар белән бәйрәм хосписның үзендә узачак. Монда ук балаларга канцелярия кирәк-яраклары тапшырылачак. Республика балалар клиник хастаханәсендәге балаларга бүләкләрне хастаханәгә китерәчәкләр.
Балалар бәйрәмен оештыруга теләге булган һәркем үз өлешен кертә ала. Мәктәп кирәк-яракларын - каләмнәрдән алып портфельләргә кадәр - мөстәкыйль рәвештә сатып алырга һәм аларны Королев урамы, 67 адресы буенча урнашкан Казан хосписына алып килергә яки теләсә нинди сумманы «Мәктәп җыелмаларын сатып алуга» тамгасы белән Анжела Вавилова исемендәге Фонд хисабына күчерергә мөмкин, дип хәбәр итә фондның матбугат хезмәте.
Барлык нечкәлекләрне +7(843) 237-97-57 телефоны номеры буенча ачыкларга була. Быел 100-дән артык балага бүләкләр бирелер, дип көтелә.
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
