Казанлылар «Батыр» картасы буенча «Ярлыкау» фильмын бушлай карый ала

Акция муниципаль кинотеатрларда гамәлдә.

Фото: Казан шәһәре KZN.RU

(Казан шәһәре KZN.RU, 4 нче май). Махсус хәрби операциядә катнашучыларның балалары «Батыр» картасы буенча «Ярлыкау» фильмын бушлай карый ала. Акция Тимер юлчылар мәдәният йортында, В.И.Ленин исемендәге мәдәни-ял комплексында һәм Сәетггалиев исемендәге мәдәният йортында урнашкан муниципаль кинотеатрларда уза.

Кино карарга килгәнче, урынны броньлау өчен, кинотеатр кассасына шалтыратырга кирәк. «Батыр» картасы буенча билетны бер балага һәм бер озата баручыга алырга мөмкин, дип җиткерделәр Казан Башкарма комитетының Мәдәният идарәсендә.

Шулай ук «Ярлыкау» фильмын «Пушкин картасы» буенча шәхси кинотеатрларда бушлай карарга мөмкин. Кинокартинаны май дәвамында, ә кайбер кинотеатрларда 30 нчы июньгә кадәр күрсәтәчәкләр.

«Ярлыкау» тулы метражлы фильмы Россия прокатына 4 нче майда чыкты. Кинокартинаны режиссер Айнур Әскәров башкорт әдәбияты классигы Мостай Кәрим повесте мотивлары буенча төшергән. Картинаның вакыйгалары Бөек Ватан сугышы елларында бара. Фильм автор-фронтовик шаһит булган реаль вакыйгаларга нигезләнгән. Хәрби драманың сюжеты үзәгендә – яшь сержант-танкист Любомир Зух һәм испан коммунистларының кызы Мария-Терезаның мәхәббәт тарихы.

Фильмның премьерасында ТР Президенты Рөстәм Миңнеханов һәм Казан Мэры Илсур Метшин да булды.

Шулай ук укыгыз

Барлык яңалыклар