Казанлылардан тыю билгеләре урнаштырылган юл кырыйларына транспорт чараларын куеп калдырмауларын сорыйлар

Рөхсәтсез калдырылган автомобильләр кар чистарту техникасы эшенә комачаулый

Тышкы төзекләндерү комитеты фотосы

Казанда парковка өчен тыелган урыннарда – «Тукталыш һәм транспорт чарасын куеп калдыру тыела» билгесе янында калдырылган автомобильләрне эвакуацияләү буенча рейдлар дәвам итә. Мондый автомобильләр урам-юл челтәрен кардан чистарту белән шөгыльләнә торган махсус техника эшенә комачаулый. Юл кырыенда калдырылган зур йөк машиналары һәм ак автобуслар хәлне аеруча катлауландыра.

Узган көннәрдә Тышкы төзекләндерү комитеты хезмәткәрләре район администрацияләре һәм ЮХИДИ вәкилләре белән бергә Шамил Усманов, Гаврилов, Курынов, Маршал Чуйков, Батыршин, Карбышев урамнарында шундый рейдлар үткәрде.

Тышкы төзекләндерү комитетында хәбәр итүләренчә, автомобильләрне эвакуацияләү кисәтү ясау буенча соңгы чара булып тора, ләкин урамнарны сыйфатлы итеп җыештыру өчен бу кирәкле гамәл санала. Белгечләр башта кардан чистартыласы мәйданчыкта эш планын төзи. Аннан соң әлеге урамнар аша уза торган юл буенда калдырылган автомобильләрнең номерларын теркәп йөриләр. Автомобиль хуҗаларына Тышкы төзекләндерү комитеты яки ЮХИДИ хезмәткәрләре бу хакта кисәтеп шалтырата һәм Авто.Дәүләт хезмәтләре аша хәбәрнамә юллана. Кар чистарту эшләре башланган вакытта машина рөхсәтсез куеп калдырылган урыннан алынмаган булса, аны штрафстоянкага җибәрәләр. Гражданнарны юл хезмәтләренең башкарасы эше турында сары юл билгеләре кисәтә.

Исегезгә төшерәбез, Казанда шәһәрнең төп магистральләрендә парковка өчен тыелган урыннарда – «Тукталыш һәм транспорт чарасын куеп калдыру тыела» билгесе янында калдырылган йөк автомобильләрен эвакуацияләү буенча рейд үткәрелде. Рейдны Дәүләт автоинспекцияcе һәм Казан Башкарма комитеты хезмәткәрләре үткәрде.

Шулай ук укыгыз

Барлык яңалыклар