Казанлыларны Мэриянең кадрлар резервына керергә чакыралар

«Шәһәр драйверлары» конкурсына гаризаны 5 нче ноябрьгә кадәр бирергә мөмкин

Фото: Казан шәһәре KZN.RU

(Казан шәһәре KZN.RU, 27 нче октябрь). Казан Башкарма комитеты «Шәһәр драйверлары» проектын башлап җибәрде, ул теләүчеләргә кадрлар резервына керергә мөмкинлек бирәчәк. Гариза бирү этабы 5 нче ноябрьгә кадәр дәвам итәчәк. Тәҗрибәле идарәчеләр дә, яшь амбицияле лидерлар да катнаша ала.

Критерийлар арасында – югары белем, ике еллык стаж, әмма иң мөһиме, оештыручылар хәбәр иткәнчә, – Татарстан башкаласын тагын да яхшырак итү теләге.

Анкетаны сылтама буенча тутырырга мөмкин, шулай ук кыска видеопрезентация һәм тәкъдимнамә хаты кирәк булачак. Шуннан соң катнашучыларның кадрлар потенциалын бәяләячәкләр. Комиссия һөнәри тәҗрибәгә, компетенцияләргә, белемнәргә һәм карьера мөмкинлекләренә бәйсез эксперт бәясе бирәчәк.

Конкурсантлар арасыннан күчмә белем бирү интенсивы узачак ярымфиналчылар сайлап алыначак. Анда катнашучыларга шәһәр практикаларын һәм кейсларын аңлатачаклар, ә аннан соң конкурсантлар шәһәр хуҗалыгының төрле юнәлешләре буенча проектлар әзерләячәк (икътисад, инновацияләр, торак-коммуналь хуҗалык һ.б.). Эштә Казан Башкарма комитеты бүлекчәләре җитәкчеләре һәм тышкы консультантлар арасыннан остазлар ярдәм итәчәк. Этап КФУның дәүләт һәм муниципаль идарә югары мәктәбе белән берлектә ТР Рәисе каршындагы Дәүләт хезмәте һәм кадрлар департаменты ярдәме белән үткәреләчәк.

Финалда командалар Казан Мэры Илсур Метшин рәислегендәге эксперт комиссиясенә үз проектларын тәкъдим итәчәк. Үзләрен уңышлы күрсәткән финалистларны шәһәр Мэриясенең кадрлар резервы составына кертәчәкләр, ә кайберләренә, бәлки, шунда ук эш турында тәкъдим килер.

Шулай ук укыгыз

Барлык яңалыклар