«Хәерле сәгатьтә, әйдаман!»: җәйге лагерьларда эшләү өчен «Ял» шәһәр үзәге базасында 200 әйдаман белем ала

Иң яхшы әйдаманнар балалар лагерьларына эшкә урнаштырылачак

Фото Балалар һәм яшьләр эшләре комитеты тарафыннан тәкъдим ителә

Казанның «Ял» шәһәр үзәге базасында «Әйдаманнар уты» дигән әйдаманнар мәктәбенең 10 нчы сезоны ачылды. 19 февральдә башланып киткән белем бирү чараларында 200 кеше катнаша. Аларның иң яхшыларына инде быел ук балалар лагерьларында эшләү мөмкинлеге биреләчәк.

144 академик сәгатькә исәпләнгән әзерлек программасы федераль стандартларга нигезләнә. Курсларда катнашучылар тарих һәм педагогика, яшь үзенчәлекләре психологиясе, балалар белән эшләүнең норматив-хокукый базасы кебек җитди фәннәр өйрәнә.

Белгечләрне әзерләүдә лидерлык сыйфатларына, үзидарәгә, балаларны мотивацияләүгә, низагларны һәм балалар арасында бер-берсен кимсетү очракларын булдырмый калу мәсьәләләренә аерым игътибар бирелә. Укытуның гамәли өлешендә студентларны чаралар эшләргә, отрядның эш планын һәм лагерь күләмендә үткәрелә торган актив кичәләр үткәрергә өйрәтәләр.

Күчмә интенсив әзерлекнең финал этабы булып тора. Ул 17–19 апрель көннәренә билгеләнгән. Уку нәтиҗәләре буенча булачак әйдаманнар имтихан тапшырып, шуннан соң аларның иң яхшылары «Ял» үзәге лагерьларына эшкә урнаштырыла.

«Әйдаманнар уты» әйдаманнар мәктәбенә 2016 елда нигез салынган. Тугыз ел эшләү дәверендә проект 1,1 меңнән артык белгеч әзерләгән, аларның 90 проценты балалар ялы өлкәсендә уңышлы эш башлаган.

Шулай ук укыгыз

Барлык яңалыклар