Казан Яшь тамашачы театры күрү сәләте бозылган тамашачылар өчен тагын 4 спектакль яраклаштыра

25 нче майда театрда «Здесь был Кай» спектаклен тифлокомментарий белән күрсәтәчәкләр.

Фото: Марат Мөгыйнов

(Казан шәһәре KZN.RU, 5 нче май). Казан Яшь тамашачы театрында күрү сәләте бозылган тамашачылар өчен тагын 4 спектакль яраклаштырыла. Театр «Особый взгляд» программасы кысаларында «Сәнгать, фән һәм спорт» хәйрия фондының грант конкурсында җиңү нәтиҗәсендә куелышларны оештыру өчен акча һәм җиһазлар ала.

Тифлокомментарийлар белән адаптацияләнгән спектакльләр киләсе сезонда ук театр афишасында барлыкка килчәкә. Болар – «Капитан кызы» (А.С.Пушкин), «Көч китабы» (А.Лысяков Г.Тукай әкиятләре мотивлары буенча язган) һәм «Төньяк Балкышы» (И.Васьковская Идел буе халыклары әкиятләре һәм легендалары мотивлары буенча язган).

Моннан тыш, Мәскәүдә «Алтын битлек» фестиваленең конкурстан тыш программасында «Здесь был Кай» спектаклен (Е.Тимофеева) күрсәткәннән соң, театр «ВОС-Фильм» проекты кысаларында кую өчен әзерләнгән тифлокомментарийлар ала. Тифлокомментарийлы спектакльнең беренче куелышы 25 нче майда 18:30 сәгатьтә була.

Казан Яшь тамашачы театрының матбугат хезмәте хәбәр иткәнчә, моңа кадәр «Чикләрсез театр» проекты һәм «Игелекле эшләр көне» хәйрия фонды ярдәмендә театрда күрү һәм ишетү сәләте бозылган тамашачылар өчен 6 спектакль яраклаштырылган. Спектакль барышында тифлокомментатор колакчыннар аша сәхнәдә булган хәлләрне тасвирлый (декорацияләр, актерларның эмоцияләре һәм гамәлләре), ә сурдотәрҗемәче начар ишетүчеләргә ишарәләр теле ярдәмендә барысын да «ишетергә» ярдәм итә.

Грант конкурсының оештыру комитетына быел Россиянең 62 шәһәреннән һәм 41 төбәгеннән театрлардан 153 гариза килгән. Илнең 34 төбәгеннән һәм 45 шәһәреннән 67 театр җиңүче булды.

Шулай ук укыгыз

Барлык яңалыклар