Казанның «Батыр» – контракт буенча хәрби хезмәткә рәсмиләштерү үзәгенә «Беренче канал»ның төшерү төркеме килде

Килешү төзегән очракта, үз теләге белән хәрби хезмәткә китәргә теләүчеләрнең 1,5 млн сумга кадәр акча алу мөмкинлеге бар

Кичә «Батыр» – контракт буенча хәрби хезмәткә рәсмиләштерү үзәгенә «Беренче канал»ның төшерү төркеме килде. Учреждениедә журналистлар ТР башкаласында тәкъдим ителә торган шартлар белән таныштылар һәм махсус хәрби операция зонасына барырга җыенган иреклеләрнең берсе Андрей белән аралаштылар.

Казанлы сөйләгәнчә, Украинада аның Рәсәйгә мөстәкыйль күченү мөмкинлегеннән мәхрүм ителгән әнисе һәм сеңлесе калган. «Мин Ватан алдындагы бурычымны үтәргә тиеш, ә аннары инде, һичшиксез, әни һәм апам белән очрашачакмын. Ә башкача ничек? Башкача – берничек тә», – дип сөйләде Андрей «Беренче канал»га.

«Батыр» үзәге Воровский урамындагы 25 нче йорт адресы буенча урнашкан. Учреждениедә документлар һәм медицина белешмәләрен җыю «бердәм тәрәзә» принцибы буенча уза һәм бер тәүлектән дә артык вакытны алмый. Мөрәҗәгать итүчеләрнең уртача саны көненә 15 тән 30 га кадәр.

Казан мэры Илсур Метшин йөкләмәсе буенча, контракт төзегәндә бер тапкыр бирелә торган муниципаль түләү 300 мең сумны тәшкил итәчәк. Барлыгы исә шәһәрдә 31 июльгә кадәр контракт төзүчеләр 1,5 млн сумга кадәр акча алачак.

Хәзер «Батыр» үзәгенең сайты барлыкка килде. Анда учреждение, түләүләр, ташламалар һәм гарантияләр, кандидатларга таләпләр турында мәгълүмат, шулай ук махсус хәрби операция уздыру зонасында кирәкле белгечлекләр исемлеге һәм кирәкле документлар исемлеге урнаштырылган.

Сайтта контакт мәгълүматларын калдырып, кире элемтә өчен гариза рәсмиләштерү мөмкинлеге бар. Контрактны рәсмиләштерергә теләүчеләр белән белгечләр элемтәгә керәчәк.