Казан аэропорты яңа халыкара һәм эчке авиарейслар ачты

Кышкы очышлар җәдвәле 2020 елның 28-нче мартына кадәр гамәлдә булачак.

(Казан шәһәре KZN.RU, 29-нчы октябрь). Казан халыкара аэропорты кышкы җәдвәлгә күчте. Шуңа бәйле рәвештә яңа эчке һәм халыкара юнәлешләр ачылды. Кышкы очышлар җәдвәле 2020 елның 28-нче мартына кадәр гамәлдә булачак.

30-нчы октябрьдән Казан – Будапешт даими рейслары эшли башлый. Рейслар чәршәмбе һәм якшәмбе көннәрендә Airbus A320 самолетларында башкарылачак.

1-нче ноябрьдән Татарстанның гражданнар авиациясе тарихында беренче тапкыр Казан – Ла-Романа (Доминикана) маршруты буенча туры трансатлантик очыш оештырылачак. 520 пассажир сыйдырышлы Boeing 777-300 лайнеры 14 көнгә бер тапкыр очачак.

Шулай ук кышкы җәдвәлдә якшәмбе көнне Екатеринбург аша Кытай Харбинына яңа рейс барлыкка киләчәк. Төркиянең Анталья шәһәренә рейсларның киң очыш программасы да кышкы сезонның яңалыгы булачак.

Моннан тыш Стамбул һәм Дубай рейслары да артачак.

Шулай ук җәдвәлдә традицион кышкы туристлык юнәлешләре дә киң тәкъдим ителгән: Санья (Кытай), Утапао (Паттайя), Пхукет, Камрань һәм Гоа.

Эчке авиарейсларга килгәндә, ноябрьдән март аена кадәр Төньяк ярымшарның салкын полюсына – Якутск шәһәренә яңа рейс ачыла. Очулар якшәмбе көннәрендә Екатеринбург аша башкарылачак.

29-нчы октябрьдән Череповецка рейс ачыла. Шулай ук бу кышта Сочи, Краснодар, Мәскәү һәм Санкт-Петербургка да очышлар саны артачак. Кышкы сезонда Казаннан Мәскәүгә көнгә уртача 18 рейс башкарыла, дип хәбәр итә Казан халыкара аэропортының матбугат хезмәте.

Шулай ук укыгыз

Барлык яңалыклар