Казан аэропорты узган елгы рекордны узып, 5 миллионнан артык пассажирга хезмәт күрсәткән

Һава гаване барлыгы 40 мең рейс ясаган

Габдулла Тукай исемендәге «Казан» халыкара аэропорты бер ел эчендә 5 миллионнан артык пассажирга хезмәт күрсәтеп, үз яңа рекордын куйды. Бу күрсәткеч 2023 елга караганда 18 көнгә иртәрәк ирешелгән.

Агымдагы елның 1 гыйнварыннан 30 ноябренә кадәр аэропорт барлыгы 40 мең рейс башкарган. Эчке (федераль) юнәлешләрдә 3 млн 478 мең кеше һәм халыкара юнәлешләрдә 1 млн 526 мең кеше күчерелгән. Узган ел белән чагыштырганда һава линияләрендә пассажирлар агымы 4% ка арткан.

2024 елда «Казан» аэропортының маршрут челтәрен киңәйтү буенча эш дәвам итә. Гомумән алганда, ул 82 юнәлешне үз эченә ала, шуларның 31е – халыкара, дип хәбәр итә һава гаване матбугат хезмәте.

China Eastern Airlines авиакомпаниясе белән берлектә Казан – Шанхай маршруты буенча Кытайга беренче туры даими рейс ачылды.

Nordwind Airlines авиакомпаниясе очыш программасын яңа юнәлешләр белән үстерде. Казаннан Кемерово, Уфа, Мурманскка, шулай ук беренче тапкыр Улан-Удэга рейслар эшләтеп җибәрделәр.

Armenian Airlines аэропортының яңа халыкара партнеры Ереванга рейслар ачты.

Татарстанның UVT Аего авиакомпаниясе Ташкентка оча, ә Red Wings Батуми белән авиаэлемтәне яңартты. Шулай ук яңадан Таиландка һәм Гоага очышлар ясарга мөмкин.

Исегезгә төшерәбез, 2023 елда «Казан» аэропорты 5 млн 168 мең пассажирга хезмәт күрсәткән, бу 2022 ел белән чагыштырганда 28,6% ка күбрәк. Бу чорда барлыгы 21,5 меңнән артык рейс башкарылган.

Шулай ук укыгыз

Барлык яңалыклар