Казан укучыларына һәм абитуриентларына табиб һөнәре турында сөйләячәкләр

Февраль башында Казан дәүләт медицина университеты «Ак халатлы фәрештәләр» дигән медицина фестивале үткәрәчәк.

(Казан шәһәре KZN.RU, 10-нчы гыйнвар). 1-нче февральдән 7-нче февральгә кадәр Казан дәүләт медицина университеты «Ак халатлы фәрештәләр - Ангелы в белых халатах» дигән медицина фестивален үткәрәчәк.

Традицион һөнәри юнәлеш бирә торган чара кысаларында факультетлар презентацияләре, дәвалау оешмалары, КДМУ музейлары буенча экскурсияләр, тренинглар, конкурслар, психологик тестлар узачак.

1-нче февральдә медицина өлкәсендә эшләргә хыялланган укучылар Татарстанның үзәк район хастаханәләренә, шулай ук Казанның алдынгы дәвалау һәм профилактика оешмаларына экскурсияләр белән килә алачак. Университетның һәр факультеты эш бирүчеләр белән бергә үз белгечлекләрен тәкъдим итәчәк. Шул ук көнне баш табиблар медицина университетын тәмамлаучылар белән очрашачак һәм эшкә урнашу мөмкинлекләре турында сөйләячәкләр.

2-нче февральдә барлык теләүчеләр университет белән якыннанрак танышу, аның җитәкчесе, профессор Алексей Созинов белән очрашуда катнашу мөмкинлегенә ия булачак.

Моннан тыш медицина квесты һәм медицина квизы үткәрү планлаштырылган. Җиңүчеләрне университеттан истәлекле сувенирлар көтә, дип хәбәр итә КДМУ матбугат хезмәте.

Шулай ук фестиваль кысаларында медицина һәм социаль тематикага лекцияләр үтәчәк. Казан дәүләт медицина университетының иң яхшы укытучылары аларны 3-7 февральдә укыячак. Лекцияләр 16.00 сәгатьтә башлана, көндәлек онлайн-трансляция алып барылачак.

Шулай ук укыгыз

Барлык яңалыклар