Казан студентлары транспорт чыгымнарына компенсация алырга мөмкин

«Транспорт гранты» конкурсында катнашу өчен 6-нчы декабрьгә кадәр гариза бирергә мөмкин.

(Казан шәһәре KZN.RU, 28-нче ноябрь). Казанның югары һәм һөнәри белем бирү учреждениеләре студентлары, «Транспорт гранты» конкурсында җиңеп, транспорт хезмәтләре өчен чыгымнарны компенсацияләүне ала алалар.

Конкурста көндезге уку формасы студентлары, иҗтимагый, фәнни, спорт яки иҗат эшчәнлегендә уңышларга ирешкән студентлар, шулай ук гаиләнең җан башына уртача кереме 20 мең сумнан артмаган социаль мохтаҗ студентлар катнаша ала.

Компенсация алу өчен студентка үзе белем ала торган уку йортында 6-нчы декабрьгә кадәр гариза бирергә кирәк. Конкурста 5792 студент җиңәчәк, алар 2019 елның гыйнвар-декабрь айларында транспорт чыгымнары өчен 11 мең сум күләмендә компенсация алачак, дип хәбәр итә Казанның Балалар һәм яшьләр эшләре комитеты. Социаль ярдәмнең гомуми суммасы 60 млн сум тәшкил итәчәк.

Транспорт субсидияләренә конкурс елына ике тапкыр үткәрелә. ТР Яшьләр министрлыгы мәгълүматларына караганда, 2011 елдан 2018 елга кадәр конкурста 80 меңгә якын студент катнашкан. Шуларның яртысыннан артыгы – 45 мең кеше - грантка ия булды.

Тулырак мәгълүматны конкурс нигезләмәсендә яки социаль челтәрләрдә табарга мөмкин.