Казан спортчылары кыска дистанциядә йөзү буенча Россия чемпионаты призерлары булдылар

Ярышлар ТР башкаласында «Дуслык уеннары»ның II этабы кысаларында уза.

Фото: ТР Спорт министрлыгы матбугат хезмәте

(Казан шәһәре KZN.RU, 23 нче ноябрь). Казан спортчылары кыска дистанциядә йөзү буенча Россия чемпионатында көмеш медальләр яулады. Ярышлар 20 нче ноябрьдән 25 нче ноябрьгә кадәр «Дуслык уеннары» халыкара ярышларының II этабы кысаларында Су спорт төрләре сараенда уза.

Валерия Саламатина – 800 метрга ирекле стильдә йөзүдә, ә Анастасия Колпакова 200 метрга баттерфляй ысулы белән йөзүдә призер булды.

Моннан тыш, Татарстан җыелма командасы 4х50 метрга катнаш кроль эстафетасында көмеш медаль яулады. Җиңү өчен Александр Обшаров, Алексей Мерзляков, Ирина Злобина һәм Олеся Корчагина көч сынашты. Команда финишка 1 минут 32,65 секунд нәтиҗә белән килде. Аларны 1 минут 32,20 секунд нәтиҗә белән йөзеп үткән Мәскәү йөзүчеләре узып китте, дип хәбәр итә ТР Спорт министрлыгы.

Исегезгә төшерәбез, «Дуслык уеннары»ның I этабы Татарстан Республикасы башкаласында 19 нчы июльдән 3 нче августка кадәр узды. Ярышлар 1 меңнән артык спортчыны берләштерде.

Уеннарның өченче, төгәлләү этабы Казанда 8-17 нче декабрьдә узачак. Спортчылар Йөзү буенча Владимир Сальников кубогы, Синхрон йөзү буенча Светлана Ромашина кубогы һәм Суга сикерү буенча Дмитрий Саутин кубогы өчен көрәшәчәкләр.

Шулай ук укыгыз

Барлык яңалыклар