Казан коткаручылары начар һава торышы шартларында Түбән Новгородтан килүче яшь хоккейчыларга ярдәм күрсәттеләр

Команда төялгән автобус буран аркасында трассада тоткарланып калган.

Фото: Казан шәһәре KZN.RU

(Казан шәһәре KZN.RU, 15-нче гыйнвар, Ксения Швецова). Казан коткаручылары Түбән Новгородтан килүче «Мотор» хоккей командасының яшь спортчыларына ярдәм күрсәттеләр. Балалар тренерлары белән бергә Чаллыга ярышларга бара торган булган, әмма буран һәм көчле кар яву аркасында Казанга керү юлында тоткарланган. Ярдәм сорап мөрәҗәгать иткәч, аларга ярдәм итү өчен урынга шәһәр Башкарма комитетының Гражданнарны яклау идарәсе хезмәткәрләре чыккан.

23.11 сәгатьтә Гражданнарны яклау идарәсенә Питрәч районындагы әйләнеп узу юлында Чаллыга ярышларга бара торган автобусның тоткарлануы турында хәбәр килә, анда балалар, тренерлар һәм ата-аналар комитеты вәкилләре утырган була. Идарә хезмәткәрләре оператив рәвештә урынга кузгала. «Һава шартлары начар булуы аркасында барлык юллар да ябылган иде. Балаларның Чаллыга бару юлы һәм кунакханәгә килү урынында яшәү өчен түләнгән, үзләре белән өстәмә акчалары булмаган, - дип сөйләде идарә башлыгы Фердинант Тимерханов. - Без аларны оператив рәвештә Казандагы кунакханәгә китерергә карар кылдык. Башка вариантлар каралмады да».

Автобуста 25 кеше иде: 11 яшьтәге 18 бала, ата-аналар комитетының өч вәкиле, ике тренер һәм ике машина йөртүче. Аларның барысын да Константиновка бистәсендәге кунакханәгә урнаштырганнар, ашатканнар һәм иртәнгә кадәр һава торышының уңайлануын көтәргә калдырганнар.

«Без коточкыч начар һава торышына эләктек, автобуслар һәм зур йөкләр хәрәкәте туктатылды, - дип сөйли «Мотор» хоккей командасының ата-аналар комитеты вәкиле Роман Кочин. Гадәттән тыш хәлләр министрлыгына ярдәм сорап мөрәҗәгать иттек. Безгә төнгелеккә урнашуда, туклануда ярдәм күрсәттеләр. Без шәһәр җитәкчелегенә, оператив хезмәтләргә безне бәладә калдырмаганнары өчен бик рәхмәтле».

Балалар Чаллыга кадәр юлны бүген 7.00 сәгатьтә дәвам итә алдылар.

«Бу Казанда беренче генә шундый очрак түгел. Мондый мизгелләр, кызганычка каршы, нәкъ менә төнлә, буран вакытында була, - дип өстәде Ф.Титмерханов. - Без мондый хәлләргә һәрвакыт җаваплы карыйбыз, балаларның иминлеге турындагы мәсьәләне хәл итү - безнең эшнең өстенлекле юнәлеше».

Исегезгә төшерәбез, 15-нче гыйнвардан Казанда көчле кар яву сәбәпле «Буран» оператив планы игълан ителде. Шәһәрдә тәүлектән азрак вакыт эчендә айлык явым-төшем нормасының яртысы яуды. Юл хезмәтләре тәүлек буе көчәйтелгән режимда эшлиләр.

Шулай ук укыгыз

Барлык яңалыклар