Казан мәктәп укучылары музыкаль индустрия серләрен беләчәкләр

Танылган Россия музыкантлары катнашында ачык онлайн-дәрес 9-нчы апрельдә узачак.

(Казан шәһәре KZN.RU, 7-нче апрель). Казан укучылары чираттагы бөтенроссия «Проектории» ачык дәресенә кушыла алачак. 8-11-нче сыйныф укучылары музыкаль индустрия серләрен 9-нчы апрельдә узачак онлайн-дәресләрдә беләчәкләр.

«Тавышын ач» дәресендә танылган Россия музыкантлары, шулай ук «Проектории» конкурслары һәм флешмоблары җиңүчеләре җырларның нинди темалардан тууын, композиция караламаларыннан нинди белгечләр хит ясый алуын, продюсерның бурычы нидән гыйбарәт икәнен һәм музыканың кешеләргә хәзерге кебек җиңел булмаган вакытта ничек ярдәм итүе хакында сөйләячәк. Барлык кунаклар да эфирга онлайн режимда кушылачак. Дәреснең модераторы булып танылган теле- һәм радиотапшырулар алып баручы Антон Комолов чыгыш ясаячак.

Лекция 13.00 сәгатьтә башлана. Аны «Проектория» порталында, социаль челтәрләрдәге проект төркемнәрендә туры эфирда теләгән һәркем карый ала. Шулай ук «ВКонтакте» социаль челтәрендә ачык дәрескә багышланган конкурсларда катнашырга һәм дәрес спикерларына туры эфирда шәхсән сораулар бирергә мөмкин булачак.

Бөтенроссия ачык дәресләре – профессиональ навигация буенча даими онлайн-дәресләр. Чаралар 8-1-нче1 сыйныф укучыларын алдынгы индустрияләр һәм перспективалы һөнәрләр, илебез фәне һәм икътисады казанышлары белән таныштыруга юнәлдерелгән. Хәзерге вакытта ачык дәресләрне 100 миллионнан артык кеше карады, дип хәбәр итә Татарстан Республикасы Мәгариф һәм фән министрлыгы матбугат хезмәте.

Шулай ук укыгыз

Барлык яңалыклар