Казанның полиция хезмәткәрләре 230 мең сумга бер кызны алдаган явыз ниятле затны тоткарлаган

Зыян күрүче арзан бәядән ике смартфон сатып алырга теләгән

Денис Гордийко фотосы

Татарстан башкаласында полиция хезмәткәрләре ялган смартфоннар сатканда бер кыздан 230 мең сум акча урлаган җинаятьчене тоткарлаган.

Казанда яшәүче 21 яшьлек кыз полициягә гариза белән мөрәҗәгать итә. Зыян күрүче сүзләренчә, ул интернет мәйданчыкларның берсендә очсыз бәядән ике смартфон сатылуы турында белдерү таба. Сатучы белән элемтәгә кереп һәм онлайн-килешү төзеп, ул күрсәтелгән счетка 230 мең сум акча күчерә. Кыз акчаны юллаганнан соң, сатучы элемтәгә чыгудан туктый, вәгъдә ителгән товар исә зыян күрүчегә җибәрелми кала.

Россия Эчке эшләр министрлыгының Казан буенча идарәсе карамагындагы «Савиново» полиция бүлегенең җинаятьчеләрне эзләү бүлекчәсе хезмәткәрләре 44 яшьлек шәһәр кешесен тоткарлый. Шикләнелүче зат үз гаебен таный һәм акчаларны шәхси ихтыяҗлары өчен сарыф итүен сөйли.

Әлеге очрак нигезендә «Алдау юлы белән чит милекне урлау» маддәсе буенча җинаять эше кузгатылган. Хәзерге вакытта тикшерү эшләре дәвам итә. Тоткарланучыга карата читкә китмәү турында чик кую чарасы сайланган.

Казан полициясе шәһәр халкын, интернетта сатып алу белән шөгыльләнгәндә, уяу булырга чакыра. Сатучының абруен тикшерү, башка сатып алучыларның фикерләрен өйрәнү, бәяләрне чагыштыру һәм акчаларны билгесез счетларга күчермәү мөһим.

Исегезгә төшерәбез, «Минем Казан» порталында киберкуркынычсызлык буенча махсус платформа эшли башлады. Яңа чыганак интернет-җинаятьләр дулкынын туктатырга тиеш. Бүлектә аккаунтларны ничек сакларга кирәген аңлаткан күрсәтмәләр, гаджетларны куллану буенча файдалы киңәшләр һәм кирәкле элемтә чыганаклары белән танышырга була. Элемтәгә керү чыганакларына аерым игътибар бирелгән: төп биттә полиция хезмәткәрләре белән элемтәгә керү өчен кайнар линия хезмәтенең телефон номерлары, шулай ук оператив консультацияләр өчен Казан мэриясендәге шалтырату үзәгенең телефон номеры урнаштырылган.

Шулай ук укыгыз

Барлык яңалыклар