Казан узышчылары ТР башкаласында «Фиджитал уеннар»да җиңү яулады

Пилотлар Борис Гарифуллин һәм Михаил Стаценконы «Формула-1» катнашучысы, «Ефәк юлы» раллиенда җиңүче Никита Мазепин котлады.

Фото: «Спорт һәм социаль проектлар дирекциясе» коммерцияле булмаган оешмасы

(Казан шәһәре KZN.RU, 25 нче ноябрь). Казанның Ek-ALGA командасы ТР башкаласында узган «Фиджитал уеннар» ярышларында җиңүче булды. Пилотлар Борис Гарифуллин һәм Михаил Стаценко янәшәдәге көндәшләреннән 21 секундка алда килеп җиңү яуладылар.

Фиджитал ярышлар 8 команда катнашында эстафета рәвешендә узды. Катнашучыларга картингта 20 тапкыр һәм Assetto Corsa симуляторы базасында 10 виртуаль әйләнешне узарга туры килде. Борис Гарифуллин һәм Михаил Стаценконы беренче урын белән «Формула-1» катнашучысы, «Ефәк юлы» раллиенда җиңүче Никита Мазепин котлады. Аның белән Ek-ALGA командасы тагын бер фиджитал-узыш үткәрде.

«Без команда балансы хисабына җиңдек, – дип уртаклашты Борис Гарифуллин. – Миша тиз симрейсер, ә минем картингта уңышларым бар иде. Без бер-беребезгә киңәш бирдек, төзәтергә кирәк булган хаталарны күрсәттек. Гомумән, фиджитал ярышларның потенциалы зур дип уйлыйм. Киләчәктә картингта түгел, ә кузовлы узыш автомобильләрендә ярышу ихтималы да булырга мөмкин».

Фиджитал-ярышларда икенче урынны K.N.Racing командасы алды, аның составында Ярослав Шевырталов һәм Максим Солдатов чыгыш ясады. Алардан соң Роман Шарапов һәм «Формула-3» җиңүчесе Александр Смоляров кергән SMP Racing командасы килде.

Чарада шулай ук стримерлар Дмитрий Ликс, Илья Яцкевич һәм Александр Парадеев, блогер Марат Кашапов, SMP Racing программасы автоузышчылары Алексей Басов, Сергей Сироткин, Виталий Петров һәм Виктор Шайтар катнашында ярыш-тамаша узды, дип хәбәр итә Спорт һәм социаль проектлар дирекциясе.

Исегезгә төшерәбез, «Фиджитал уеннар» халыкара ярышлар сериясенең приз фонды 5,5 млн сум тәшкил итә. Узышлардан тыш тагын ике дисциплинада ярышлар узачак. Әйтик, иртәгә, 26 нчы ноябрьдә, фиджитал-көрәш, ә 10 нчы һәм 11 нче декабрьдә фиджитал-хоккей матчлары оештырылачак.

«Фиджитал уеннар» ТР башкаласында сынау чаралары кысаларында 2024 елда шәһәрдә узачак «Киләчәк уеннары» турниры алдыннан үткәрелә. Барлыгы 5000 нән артык катнашучы көтелә. Бөтен дөнья буенча кибер ярышларны 150 миллионга кадәр кеше онлайн тамаша кылыр дип фаразлана.

Шулай ук укыгыз

Барлык яңалыклар