Казан спортчысы кыяга менү буенча Бөтенроссия ярышларында бронза яулады

Мәскәүдә Россия һәм Белоруссиядән меңгә якын катнашучы җыелды - алар арасында 24 комплект бүләк уйнатылды

«Авиатор» ФСБ тәрбияләнүчесе кыяга менү буенча Бөтенроссия ярышларында бронза яулады. Алисә Вәлиева 18–19 яшьлек яшүсмерләр арасында «авырлыкка менү» дисциплинасында югары нәтиҗәләр күрсәтте.

Ярышлар 22-27 март көннәрендә Мәскәүнең ЦСКА (Армиянең үзәк спорт клубы) кыяга менү үзәгендә узды. Россия Беренчелегендә һәм Бөтенроссия ярышларында Россиянең һәм Белоруссиянең 52 төбәгеннән 10 яшьтән 19 яшькә кадәрге меңгә якын катнашучы чыгыш ясады. Алар арасында 24 комплект бүләк уйнатылды, дип хәбәр иттеләр Россиянең кыяга менү Федерациясендә.

Казан спортчысын ярышларга тренер-укытучы Евгения Вәлиева әзерләгән, дип билгеләп үттеләр шәһәрнең физик культура һәм спорт комитетында.

Элегрәк хәбәр ителгәнчә, ТР башкаласында яшәүче Демьян Макаров Олимпия чемпионы Роман Дмитриев истәлегенә багышланган спорт көрәше буенча XI халыкара ярышларда алтын медаль яулады.

Шулай ук укыгыз

Барлык яңалыклар