Яңалыклар
20.10.2019, 08:46
Казанның The Road Рок мәктәбе ун еллык юбилеен билгеләп үтте
«Московский» мәдәни үзәгендә мәктәп укучыларының концертында Россия рок легендасы Андрей Сапунов чыгыш ясады.
(Казан шәһәре KZN.RU, 20-нче октябрь). Кичә Казанның The Road Рок мәктәбе үзенең ун еллык юбилеен билгеләп үтте. «Московский» мәдәни үзәге сәхнәсендә мәктәп укучылары чыгыш ясады, ә чараның төп хедлайнеры Россия рогы легендасы, «Воскресение» төркеме башкаручысы Андрей Сапунов булды.
Рок мәктәбе 2009 елда Казанның 5-нче номерлы балалар музыка мәктәбе базасында оештырылды, 2015 елдан башлап ул мөстәкыйль учреждение буларак эшли. Проект муниципаль мәдәният һәм сәнгать учреждениеләре иҗат коллективлары проектларына ярдәм итү өчен Татарстан Республикасы Хөкүмәте грантын алды.
The Road - Россиядә рок-музыканың беренче һөнәри мәктәбе. Аның тантаналы ачылышында, 2015 елның 15-нче сентябрендә, Казан Мэры Илсур Метшин, Андрей Сапунов һәм «Воскресение» төркеме катнашты. Рок мәктәбенә Мәскәү ур., 57/13 адресы буенча урнашкан, тавыш изоляциясе һәм акустика технологияләре ярдәмендә махсус ремонтланган бина тапшырылды. Шул ук елны The Road яшь рок-музыкантларны укыту өчен кирәкле тавыш җиһазлары белән тулысынча җиһазландырылды.
ТР мәдәният министры урынбасары Ленар Хәкимҗанов рок мәктәбе укытучыларын һәм тәрбияләнүчеләрен әлеге мөһим дата белән котлады - ул учреждение җитәкчелегенә һәм хезмәткәрләренә ТР Министрлар Кабинетының Рәхмәт хатын һәм ТР Мәдәният министрлыгының Мактау грамоталарын тапшырды. Казан Башкарма комитетының мәдәният идарәсе башлыгы Азат Абзалов мәктәпкә Казан Мэрының Рәхмәт хатын, Мәдәният идарәсенең Мактау грамоталарын тапшырды.
The Roadның юбилее уңаеннан мәктәп укучылары, укытучылары, шулай ук тамашачылар, рок-музыка яратучылар алдында Андрей Сапунов ярты сәгатьлек музыкаль программа белән чыгыш ясады.
Рок мәктәбе укытучылары арасында - Татарстан Республикасының атказанган артисты Рөстәм Муллин, «Мураками» төркеме солисткасы Диләрә Ваһапова, Татарстан Республикасы халык уен кораллары дәүләт оркестры солисты Виктор Севостьянов, халыкара һәм бөтенроссия конкурслары лауреаты Ольга Глухова, Казанда танылган рок-төркем солистлары һәм җитәкчеләре. Рок-мәктәптә уникаль укыту методикасы үз эченә мастер-класслар һәм Россия һәм дөнья рогы легендалары белән иҗади очрашулар системасын ала. Яшь рокерларны укытуның аерылгысыз өлешенә әверелгән иҗади очрашуларны биредә Джо Кокер, Кен Хенсли, Андрей Макаревич, Андрей Сапунов, Дмитрий Спирин, «Чиж & Co», «Воскресение», «Ляпис Трубецкой», «Тантра», «Звери», «Tesla Boy», «Мистер-Твистер», Зуля Камалова (Австралия), Акихиро Танака (Япония), Сергей Седых, Сергей Бугаев, Михаил Борзыкин һәм «Телевизор» төркеме һәм башкалар үткәрде.
Рок мәктәбе эшли башлаганнан бирле аның тәрбияләнүчеләре соло башкаруда һәм төркемнәр составында зур җиңүләргә ирештеләр. Алар Мәскәүдә, Екатеринбургта, Казанда, Санкт-Петербургта, Түбән Новгородта узган фестивальләрдә һәм конкурсларда катнаштылар. Ә Ca Va Bien төркеме, илдә иң өлкән «Индюшата» музыкаль фестиваленең гран-приен алып һәм интернет-тавыш бирүдә җиңеп, Россиянең иң яхшы инди-төркеме булды. Казанның Рок мәктәбе укучылары тәҗрибәсендә - төрле дәрәҗәдәге конкурсларда 250-дән артык җиңү.
Моннан тыш, The Road Казан яшьләре өчен сизелерлек һәм әһәмиятле зур фестивальләр һәм акцияләр өчен нигезгә әверелде: Rock Is Art һәм «Кремльдә Рок» ачык һавада узган рок-фестивальләре. 2016 елдан Рок мәктәбендә тавыш яздыру студиясе - Road Records ачылды. Болактагы Яшьләр театрында The Road Of Rock дискын тәкъдир итү булды, аны яздыруда рок-мәктәпнең иң яхшы төркемнәре катнашты. Оешма шулай ук «Rock Smena: Музыкаль каникуллар» иҗади сменаларын үткәрү инициативасы белән чыгыш ясады - балалар ял лагерьлары базасында рок-инструментларда уйнау нигезләренә өйрәнә һәм Рок мәктәбе укытучылары җитәкчелегендә үз күнекмәләрен камилләштерә ала.
Шулай ук укыгыз
-
30.04.2025, 15:45 -
30.04.2025, 14:03 -
30.04.2025, 09:14 -
29.04.2025, 17:56
