Казанның 65 нче мәктәбе сәламәтлек мөмкинлекләре чикле укучылар өчен махсус шартлар тудыру буенча илдә иң яхшысы дип табылды

Бүген Мәскәүдә бөтенроссия конкурсына йомгак ясалды.

Фото: Мәгариф идарәсе

(Казан шәһәре KZN.RU, 28 нче октябрь). Казанның 65 нче мәктәбе «Россиянең иң яхшы инклюзив мәктәбе» конкурсында «Сәламәтлек мөмкинлекләре чикле укучылар өчен иң яхшы махсус шартлар системасы» номинациясендә җиңүче булды.

Татарстан башкаласын конкурста Вахитов районының 63 нче номерлы балалар бакчасы һәм Мәскәү районының 65 нче номерлы мәктәбе тәкъдим итте. Учреждениеләр «Иң яхшы инклюзив балалар бакчасы» һәм «Иң яхшы инклюзив мәктәп» номинацияләрендә лауреат булдылар.

Конкурс финалында җиңү өчен илнең 41 төбәгеннән 60 учреждение көч сынашты. Бүләкләү тантанасы бүген Мәскәүдә, Россиянең Җәмәгать палатасында узды, дип хәбәр итә Казанның Мәгариф идарәсе.

Исегезгә төшерәбез, конкурсның региональ этабы август ахырында тәмамланды, анда катнашу өчен илнең 62 төбәгеннән 226 оешма гариза бирде. Беренче сынауларда җиңүчеләр федераль дәрәҗәдә читтән торып үткәрелгән икенче этапка үттеләр. Ярышлар 11 нче сентябрьдән 10 нчы октябрьгә кадәр узды. Жюри инклюзив практикалар һәм учреждениеләрнең педагогик технологияләре кейсларын бәяләде. Казанның 63 нче балалар бакчасы һәм 65 нче мәктәбе һәр номинациядә иң яхшы 20 учреждение арасына керде.

«Россиянең иң яхшы инклюзив мәктәбе» бөтенроссия конкурсы 2013 елдан бирле үткәрелә. Бу вакыт эчендә анда 1356 мәгариф оешмасы һәм 28 балалар ялы һәм аларны савыктыру оешмалары катнашкан. Конкурс Россия Мәгариф министрлыгы һәм Мәскәү дәүләт психология-педагогика университеты тарафыннан оештырылган.

Шулай ук укыгыз

Барлык яңалыклар