Казан пенсионеры мошенникларга ышанмаган һәм 400 мең сум күләмендәге акчасын саклап калган

Җинаятьчеләр телефон аша зыян күрүченең күршесе юл-транспорт һәлакәтенә эләгүен һәм аңа кыйммәтле операция таләп ителүен хәбәр иткәннәр.

Фото: Марат Мөгыйнов

(Казан шәһәре KZN.RU, 18 нче август). Казанда яшәүче пенсионер ханым, җинаятьчеләр аннан 400 мең сум акча таләп иткәч, полициягә мөрәҗәгать иткән. Мошенниклык турындагы маддә буенча (РФ Җинаять кодексының 159 маддәсенең 3 өлеше) җинаять эше кузгатылган. Полиция хезмәткәрләре җинаятькә катнашы булган затларны ачыклый, дип хәбәр итә Россия Эчке эшләр министрлыгының ТР башкаласы буенча идарәсе матбугат хезмәте.

Пенсионерның сүзләренә караганда, берничә көн элек аңа билгесез ханым шалтыраткан. Ул зыян күрүченең күршесе юл-транспорт һәлакәтенә эләккән һәм аңа кыйммәтле операция кирәк, дип хәбәр иткән. Пенсионер ханым ышанмаган һәм сөйләшүне өзгән. Күршесе белән элемтәгә кереп, ул аны алдарга маташуларын аңлаган.

Мошенниклык очраклары ешаюга бәйле рәвештә, Россия Эчке эшләр министрлыгы халыкны игътибарлы булырга чакыра. Кесә телефонына шалтыратып, туганнарыгыз турында мәгълүмат җиткерүче билгесез затларга ышанырга кирәкми. Шулай ук банк картасыннан акча урлау очракларын булдырмас өчен, счетның торышы турында хәбәр итә алган бердәнбер оешма – аңа хезмәт күрсәтүче банк булуын истә тотарга кирәк. Әгәр карта белән нинди дә булса операцияләр үткәрелүен сизсәгез, аны блокировкалау турында СМС-хәбәр килсә, кичекмәстән банкка мөрәҗәгать итәргә кирәк. Банкның клиент хезмәте телефоны гадәттә картаның икенче ягында күрсәтелә. СМС-хәбәрдә күрсәтелгән номерларга шалтыратып, хәбәр юлларга кирәкми, моның өчен өстәмә түләү алынырга мөмкин.

Шулай ук укыгыз

Барлык яңалыклар