Казанлы вэйци буенча Кытай илчесенең XI Кубогын яулады

Ярышларда 400 гә якын спортчы катнашты

Фото: Мәскәү Вэйци федерациясе матбугат хезмәте

(Казан шәһәре KZN.RU, 19 нчы декабрь). Казан спортчысы, Россиянең гроссмейстеры Александр Динерштейн Россия Федерациясендә «го» исеме астында билгеле булган вэйци – интеллектуаль уен буенча Кытай илчесенең XI Кубогын яулады. Ярышлар Мәскәүдә 16 нчы һәм 17 нче декабрьдә узды, анда бөтен илдән, шул исәптән Красноярск, Хабаровск һәм Петропавловск-Камчаткадан 400 спортчы катнашты.

Финалда Казаннан берьюлы ике уенчы очрашты. Узган турнирның җиңүчесе Илья Шикшин Александр Динерштейнның оппоненты иде. Уен бер сәгатьтән артык барды, партиянең икенче яртысында көндәш бирелде.

Бу инде Александр Динерштейнның Кытай илчесе кубогында өченче җиңүе. Го буенча җиде тапкыр Европа чемпионы һәм дүрт тапкыр Россия чемпионы өченче профессиональ данга ия. Казанлы – илдә мондый статуска ия булган ике уенчының берсе, дип хәбәр итә ТР Спорт министрлыгы матбугат хезмәте.

Вэйци, яки го – стратегик эчтәлекле логик өстәл уены, ул Борынгы Кытайда, төрле бәяләмәләр буенча, ике-биш мең еллар элек барлыкка килгән. Россиядә соңгы елларда ул бик популярлашты.

Кытайның вэйци буенча илчесе Кубогы 1997 елдан бирле уйнала. Ярышларны оештыручылар булып Россиядә КХР илчелеге, Россия Го федерациясе һәм Мәскәү Го федерациясе тора. Турнир физик культура һәм спорт өлкәсендә Россия-Кытай хезмәттәшлеге кысаларында Мәскәү спорт комитеты ярдәме белән үткәрелә.

Шулай ук укыгыз

Барлык яңалыклар