«Казан. Үткәнгә сәяхәт»: Татарстан Республикасы башкаласында беренче тапкыр халыкара рыцарьлар фестивале уздырыла

Чарада катнашу өчен теркәлергә кирәк

2 ноябрьдән 4 ноябрьгә кадәр Татарстан Республикасы башкаласында беренче тапкыр «Казан. Үткәнгә сәяхәт» дип аталган халыкара рыцарьлар турнир-фестивале уздырыла. Чара йөзләгән көрәшче өчен көч сынашу мәйданчыгы булачак. Күпләр өчен ул ярминкәләр гөрләп торган тарихи фестиваль буларак истә калачак. Турнир илкүләм «Туризм һәм кунакчыллык» проектын гамәлгә ашыру кысаларында оештырыла.

Фестиваль Казан федераль университетының «Уникс» спорт комплексында узачак. Турнирга Россиянең барлык төбәкләреннән билгеле бер тарихи чорның матди яки рухи мәдәниятен, тарихи вакыйгаларны яңадан торгызу белән шөгыльләнүче иң яхшы спортчылар киләчәк. Шәхси ярышларда 150гә якын көрәшче, ә турнир юнәлешләрендә 200дән артык спортчы катнашачак. Әлеге вакыйгага Себер һәм Ерак Көнчыгыш федераль округлары, Казахстан, Кыргызстан һәм башка төбәк вәкилләре дә кушылачак.

Фестиваль кунакларын тарихи чыганакларга нигезләнеп оештырылган ярминкә көтә. Анда Россиянең әйдәп баручы осталары катнашачак. Интерактив зоналары булган «Урта гасырдан иртәрәк чор», «13-14 гасырдагы Рус дәүләте» һәм «Идел буе Болгары» экспозицияләре эшләячәк. Җәядән ату остаханәләре оештырылачак. Программага шулай ук эксперименталь археология буенча лекцияләр, тарихи уеннар һәм фестивальгә багышланган экскурсия кебек башка чаралар да кертелгән.

Фестиваль Профессор Нужин урамы, 2 йорт адресы буенча узачак, дип хәбәр итә Татарстан Республикасы Туризм комитеты.

Чара бушлай оештырыла, катнашу өчен әлеге сылтама аша алдан теркәлергә кирәк.