Казан «Нуриев сезоннары» мәдәни проектына кушыла

Тамашачыларга балет артисты Рудольф Нуриев турында документаль фильмнар күрсәтәчәкләр.

Фото: Казан шәһәре KZN.RU

(Казан шәһәре KZN.RU, 1 нче март). «Нуриев сезоннары» халыкара мәдәни проекты быел 10-27 нче март көннәрендә узачак. Чара Мәскәү, Уфа һәм Казан шәһәрләрен колачлый. Танылган балет артисты һәм хореограф Рудольф Нуриевка багышланган кинофестивальнең төп соңгы чаралары 22-27 нче март көннәрендә ТР башкаласында оештырыла. «Мир» кинотеатры мәйданчыгында тамашачыларга документаль фильмнар күрсәтеләчәк, фотографияләр күргәзмәсе була, мастер-класслар узачак, китаплар тәкъдир ителәчәк.

«Нуриев сезоннары»ның тантаналы ачылышы 23 нче мартта булачак, бу көнне тамашачыларга «Венеция, Карнавал, Любовь» Италия нәфис фильмының ретро-премьерасын күрсәтәчәкләр, Нуриев кинодагы соңгы ролен нәкъ менә шунда уйнаган.

Фестиваль көннәрендә артист турында бушлай документаль фильмнар күрсәтү, проектны оештыручылар, фильмнар төшерүчеләр, китап авторлары, Татарстан сәнгать эшлеклеләре белән очрашулар көтелә, дип хәбәр итә «Татаркино» дәүләт бюджет мәдәният учреждениесе матбугат хезмәте. Шулай ук фестиваль көннәрендә Рудольф Нуриевның аз билгеле фотографияләре күргәзмәсе, балет артистларыннан мастер-класслар, Нуриев турында китаплар тәкъдир итү булачак.

Барлык чаралардан да Youtubе-каналда, проектның сайтында һәм социаль челтәрләрендә онлайн-трансляция алып барылачак. Казанда (12 яшьтән өлкәнрәк тамашачылар өчен) бушлай кино күрсәтү җәдвәле белән проект сайтында танышырга мөмкин.

Шулай ук укыгыз

Барлык яңалыклар