Казан Милан шәһәр азык-төлек сәясәте пактының VII Глобаль форумында катнашты

Евгения Лодвигова форумда катнашучыларга «Балалар өчен сәламәт туклану» шәһәр программасын тәкъдим итте.

Фото: Халыкара һәм муниципальара элемтәләр идарәсе

(Казан шәһәре KZN.RU, 21-нче октябрь). Барселонада 19-нчы октябрьдән 21-нче октябрьгә кадәр халыкара күргәзмә үзәгендә уза торган Милан шәһәр азык-төлек сәясәте пактының VII Глобаль форумы тәмамлана. Форумда Татарстан башкаласы вәкилләре катнаша. Казан муниципаль берәмлеге башлыгы урынбасары Евгения Лодвигова форумда катнашучыларга быел 15 яше тулган «Балалар өчен сәламәт туклану» шәһәр программасын тәкъдим итте.

Е.Лодвигова форумның пленар утырышында мәктәп туклануын оештыру тәҗрибәсе белән уртаклашты. Ул шәһәр программасының сәламәт туклануны тәэмин итүгә, укучылар рационының төрлелеген арттыруга, аларның сәламәтлеген саклауга һәм ныгытуга юнәлдерелгән булуын сөйләде. «Балаларның хәле һәм киләчәктә аларның потенциаль мөмкинлекләре балаларны дөрес туклану тәртибенә өйрәтүгә бәйле», – дип ассызыклады Казан шәһәре муниципаль берәмлеге башлыгы урынбасары.

Моннан тыш, пленар утырышта катнашучыларга ул «Сәламәт шәһәрләр. Балалар өчен сәламәт туклану» халыкара проекты турында сөйләде, ул Милан пактының беренче Евразия региональ форумы булды.

Пленар сессиядә шулай ук Барселона мэры Ада Колау, Бордо мэры Пьер Юрмик, Милан мэрының урынбасары Анна Скавуцо, БМОның азык-төлек һәм авыл хуҗалыгы оешмасы генераль директоры Кью Донгуи һәм «Берләшкән шәһәрләр һәм җирле хакимият» халыкара ассоциациясенең генераль секретаре Эмилия Саиз чыгыш ясады.

Форумда азык-төлек инфраструктурасының башка мәсьәләләре, азык-төлек системасын үзгәртеп кору өчен граждан җәмгыяте һәм җирле хакимият органнарының хезмәттәшлеге, бу эштә күпләп сату базарларының роле һәм климат үзгәрү проблемаларын хәл итү өчен интеграцияләнгән җирле азык-төлек экосистемалары турында да сүз барды.

Моннан тыш, Казанның халыкара һәм муниципальара элемтәләр идарәсе башлыгы Руслан Галиәхмәтов Евразия һәм Көньяк-Көнбатыш Азия регионының төбәк стратегик сессиясе утырышын үткәрде. Анда Мәскәү, Тель-Авив (Израиль), Кишинев (Молдова), Бишкәк (Кыргызстан), Улан-Батор (Монголия), Вифлеем (Палестина) һәм Чабаксар вәкилләре катнашты. Сессиядә якындагы ике елга стратегик максатлар һәм бурычлар билгеләнде.

Р.Галиәхмәтов шулай ук пленар сессиянең модераторы булды, анда Милан пактының алты төбәге –Африка, Азия-Тын океан регионы, Евразия һәм Көньяк-Көнбатыш Азия, Европа, Төньяк, Үзәк Америка һәм Көньяк Америка илләренең төбәк стратегик сессияләре нәтиҗәләре тәкъдим ителде, дип хәбәр итә Казанның халыкара һәм муниципальара элемтәләр идарәсе.

Исегезгә төшерәбез, Милан пакты Европада туклану өлкәсендә әһәмиятле инновацион шәһәр стратегиясе һәм EXPO 2015 Милан күргәзмәсенең төп мирасы булып тора. Бүген Милан пактына гомуми халкы 350 млн. нан артык булган 217 шәһәр имза куйган.

Казан 2021 елның маенда 2021-2023 еллар чорына Милан пактының Координация советы рәисе шәһәре дип билгеләнде. Казан бу сыйфатта Милан пакты эшчәнлеген глобаль дәрәҗәдә тәкъдим итә. Тель-Авив шәһәре белән бергә Казан шулай ук «Евразия һәм Көньяк-Көнбатыш Азия» төбәгендә төп төбәк координаторы булып тора.

Шулай ук укыгыз

Барлык яңалыклар