Казан «Россиянең музей маршрутлары» федераль проектын кабул итәчәк

Шәһәрлеләр өчен Мәскәү спикерларыннан бушлай лекцияләр үткәреләчәк

Фото: Денис Гордийко

Казан беренче тапкыр «Россиянең музей маршрутлары» федераль проектын кабул итәчәк. Ул төрле мәйданчыкларда узачак, анда 300 гә якын кунак катнашыр дип көтелә. Чара 24-27 нче апрельгә планлаштырылган.

Проект барышында бөтен илдән җыелган музейчылар очрашулары үтәчәк. Алар тармакны үстерү һәм үзара хезмәттәшлек турында фикер алышачак. Чарага РФ Мәдәният министрлыгы вәкилләре, федераль һәм төбәк музейлары җитәкчеләре, экспертлар, Татарстан муниципаль берәмлекләренең мәдәният идарәләре җитәкчеләре чакырулы.

Төп эш көннәре 25 нче һәм 26 нчы апрельгә билгеләнгән. Программа Качалов театрында музейлар арасында килешүләр имзалаудан башланачак. Шуннан соң барлык теркәлгән казанлыларны ачык лекцияләр көтә. Беренче көнне әдәби тәнкыйтьче һәм В.И.Даль исемендәге Россия әдәбияты тарихы дәүләт музее директоры Дмитрий Бак «Александр Сергеевич Пушкин – Россия мәдәнияте коды!» темасына лекция укыячак.

Икенче көнне, 26 нчы апрельдә, программа Казан Кремленең Гавами урыннарында дәвам итәчәк. Анда рәссам һәм РОСФОТО дәүләт музей-күргәзмә үзәге генераль директоры Захар Коловский «Тормышыбызда фотография» темасына чыгыш ясаячак. Сылтама буенча теркәлергә мөмкин.

Форумның турыдан-туры трансляциясе сайтта алып барылачак, дип хәбәр итә ТР Милли музее матбугат хезмәте.

Быел «Россиянең музей маршрутлары» дүрт республикада узачак. Татарстаннан соң проектны Чечня, Дагыстан һәм Бурятия кабул итәчәк.

Шулай ук укыгыз

Барлык яңалыклар