Казан – «Милләтләр кроссы – 2023»тә катнашучылар саны буенча РФ шәһәрләре арасында лидер

ТР башкаласында узган ярышларда 20 меңгә якын кеше катнашты

Фото: Марат Мөгинов

(Казан шәһәре KZN.RU, 18 нче сентябрь). 500 меңнән артык кеше «Милләтләр кроссы» бөтенроссия йөгерешендә катнашты. Казан һәм Екатеринбург атлетлар саны буенча лидерлар булдылар – бу шәһәрләрдә стартларга 20 меңгә якын кеше чыкты. Бу хакта РФ вице-премьеры Дмитрий Чернышенко хәбәр итте.

«20 ел эчендә «Милләтләр кроссы» узышы чын мәгънәсендә бөтенхалык спорт бәйрәменә әверелде, быел Россиядә яшәүче ярты миллионнан артык кеше төрле субъектларда стартка чыкты. Ярышларда яңа төбәкләр гражданнары катнашты, бу аларның илнең спорт тормышына интеграциясен ачык күрсәтә. «Спорт – тормыш нормасы» федераль проекты кысаларында гамәлгә ашырыла торган мондый ярышлар Россия Президенты Владимир Путинның максатына ирешүдә ярдәм итә: 2030 елга спорт белән даими шөгыльләнүче гражданнарның өлеше 70% тан ким булмаска тиеш», - дип китерә ТАСС.

«Милләтләр кроссы»на быел 100 дән артык шәһәр халкы кушылды. Иң зур стартлар Санкт-Петербургта, Уфада, Брянскида, Сыктывкарда, Чебоксарда узды. Беренче тапкыр ярышларда Запорожье һәм Херсон өлкәләре халкы катнашты.

«Милләтләр кроссы» спортның чыннан да ил халкы өчен тормыш нормасына әверелүен раслады, без йөгерү нәтиҗәләренең сыйфатлы үсүен күрәбез, ә күбрәк тренерлар һәм спортчылар Бөтенроссия йөгерү көнен зур стартларга әзерлек этабы итеп карыйлар. Әмма шул ук вакытта күп кенә төбәкләрдә «Милләтләр кроссы» Россиянең иң якты спорт бәйрәмнәренең берсенә дистәләгән мең кешене җыючы мөһим шәһәр вакыйгасына әверелә», – дип билгеләп үтте РФ спорт министры Олег Матыцин.

Исегезгә төшерәбез, «Милләтләр кроссы» бөтенроссия йөгерү көне Россия Федерациясендә ел саен сәламәт яшәү рәвешен популярлаштыру һәм россиялеләрне даими рәвештә физик культура һәм спорт белән шөгыльләнүгә җәлеп итү өчен үткәрелә.

Казанда Бөтенроссия йөгерү көненә 18,7 мең кеше кушылды. Иң яшь катнашучы – биш яшьлек Яна Скузлова, иң олысы 76 яшьлек Клавдия Николаева булды.

Шулай ук укыгыз

Барлык яңалыклар