Казан һәм Якутск муниципальара хезмәттәшлек турында килешү төзеделәр

Имзалау тантанасында Рөстәм Гафаров һәм Якутск шәһәр округы башлыгы Евгений Григорьев катнашты.

Фото: Денис Гордийко

(Казан шәһәре KZN.RU, 9-нчы июнь). Казан Ратушасында кичә «Якутия - Татарстан» төбәкара форумы узды. Чара кысаларында Казан һәм Якутск муниципалитетара хезмәттәшлек турында килешү төзеделәр. Килешүне имзалау тантанасында Татарстан Башкарма комитеты җитәкчесе Рөстәм Гафаров һәм Якутск шәһәр округы башлыгы Евгений Григорьев катнашты.

Килешү шәһәрләрнең халык мәнфәгатьләрендә муниципальара хезмәттәшлекне үстерәчәген күздә тота. Казан һәм Якутск төрле өлкәләрдә: икътисад, мәдәният һәм сәнгать, яшьләр сәясәте, спорт һәм башка юнәлешләрдә хезмәттәшлек итәчәк һәм тәҗрибә алмашачак.

Килешү шәһәр хуҗалыгының төрле өлкәләрендә мәсьәләләрне хәл итү буенча иң яхшы тәҗрибәләрне өйрәнергә һәм гамәлгә кертергә мөмкинлек бирәчәк. Шулай ук документ кече һәм урта эшмәкәрлек субъектлары арасында элемтәләрне киңәйтүгә, мәгариф, медицина һәм башка оешмалар арасында элемтәләрне үстерүгә һәм, тулаем алганда, ике шәһәрнең дустанә мөнәсәбәтләрен һәм үзара файдалы хезмәттәшлеген ныгытырга ярдәм итәчәк.

Форумда шулай ук Татарстан һәм Саха Республикасы сәүдә-сәнәгать палаталары арасында хезмәттәшлек турында килешү имзаланды. Моннан тыш, уртак эш турында килешүләрне ике республиканың аерым районнары төзеде.

Чарада Саха (Якутия) Республикасының РФ Президенты каршындагы даими вәкиле – республика хөкүмәте рәисенең беренче урынбасары Андрей Федотов, төрле министрлыклар һәм ведомстволар җитәкчеләре катнашты.