«Черек күл» паркында шугалак кунакларны 27 нче декабрьдә кабул итә башлаячак

Ачылу көне яңадан һава шартлары аркасында күчерелде.

Фото: Марат Мөгыйнов

(Казан шәһәре KZN.RU, 26 нчы декабрь). Казанның «Черек күл» паркында шугалакны ачу тантанасы кабат күчерелде. Боз мәйданчыгы техник режимда эшли башлаячак, дип планлаштырылган иде, әмма һава торышы аркасында килүчеләрне бер көнгә соңрак, 27 нче декабрь кичендә кабул итә башлаячаклар.

Бүген боз катыру кулдан башкарыла, ә иртәгә финал эшләренә махсус техника җәлеп ителәчәк, дип хәбәр итә Казанның парклар һәм скверлар дирекциясе.

ТР башкаласы халкы һәм кунаклары 400 пар тимераякны арендага ала алачак. Үз инвентарең белән шугалакка бушлай килергә мөмкин.

Паркта алтынчы ел рәттән шугалак ясала, ләкин кышкы сезонда аның үз концепциясе булачак. Кара һәм ак, яхшылык һәм начарлык, игелеклек һәм явызлыкны каршы кую буларак «Чагылдыру» программаның төп темасы булачак. Концепциянең төп элементы «Кара арка» арт-объекты булачак, ул һәркемгә таныш истәлекле урынның – «Гашыйклар аркасы»ның үзенчәлекле чагылышы булып хезмәт итәчәк. Арканың акустик эффекты сәнгать объектында палиндром язмалары рәвешендә биреләчәк.

Шугалак эшен көткәндә, бу ял көннәрендә казанлылар берничә чараны – чыршы шәһәрчекләрен ачу, Раштуа музыкасы кичәсен, курчак спектаклен, перформансны һәм хайкингны бушлай карый алачаклар.

Ачык һәм ябык шугалак, хоккей тартмалары һәм чаңгы трассалары исемлеге һәм аларның эш режимы белән сылтама буенча KZN.RU порталында танышырга мөмкин.

Шулай ук укыгыз

Барлык яңалыклар