Казанда 4 нче һәм 11 нче сентябрьдә «Апуш» балалар татар театр студиясенә кастинг узачак

Сайлап алуны узган яшьләр Ленин исемендәге мәдәни-досуг комплексында һәм «Чулпан» мәдәният үзәгендә актерлык осталыгын өйрәнәчәкләр.

Фото: Денис Гордийко

(Казан шәһәре KZN.RU, 2 нче сентябрь). 4 нче һәм 11 нче сентябрьдә «Апуш» балалар театр студиясе укуга кастинглар үткәрәчәк. Аларда 9 яшьтән алып 15 яшькә кадәрге, татар телен белгән укучылар катнаша ала. Сайлап алуны узган укучылар сентябрь аенда Ленин исемендәге мәдәни-досуг комплексында һәм «Чулпан» мәдәни үзәгендә ачылачак яңа студияләрдә бушлай шөгыльләнә алачак. Проект Казан Мэриясе тарафыннан тормышка ашырыла.

Кастингта укучылар җыр яки бию башкарырга, шигырьләр укырга, үзләре турында сөйләргә һәм жюри әгъзалары биремнәрен үтәргә тиешләр.

Ленин исемендәге мәдәни-досуг комплексында сайлап алулар 4 нче сентябрьдә 12.00 сәгатьтән 18.00 сәгатькә кадәр барачак. Яшь талантларга ТР халык артисты, К.Тинчурин театры актрисасы Зөлфия Вәлиева, ТР атказанган артисты, Г.Камал театры актрисасы Миләүшә Шәйхетдинова, ТР атказанган артисты, «Казан» бию ансамбле солисты Ренат Мифтахов һәм «Апуш» студиясе җитәкчесе, актерлык осталыгы буенча педагог Алия Фәйзрахманова бәя бирәчәк.

Киләсе кастинг 11 нче сентябрьдә 12.00 сәгатьтән 18.00 сәгатькә кадәр «Чулпан» мәдәни үзәгендә узачак. Әлеге мәйданчыкка жюри сыйфатында ТР атказанган артисты, Г.Камал театры актеры Алмаз Сабирҗанов, ТР атказанган мәдәният хезмәткәре, сәхнә сөйләме буенча педагог Илсөяр Шиһапова, вокалчы Гөлнара Шәйхетдинова, хореограф Миләүшә Гыйльметдинова һәм «Апуш» студиясе җитәкчесе Алия Фәйзрахманова чакырылган, дип хәбәр иттеләр Казан Башкарма комитетының Тел культурасы өлкәсендә милли сәясәтне тормышка ашыру бүлегендә.

Кастингта катнашу өчен гаризалар teatrstudio_kzn@mail.ru электрон адресы буенча кабул ителә, тулы исемне, яшь һәм контакт телефонын күрсәтергә кирәк.

Исегезгә төшерәбез, «Апуш» балалар татар театр студиясе 2022 елның февралендә «Сәйдәш» мәдәни үзәгендә ачылды. Ул вакытта сайлап алу турында 100 катнашучыдан 30 бала сайлап алынды. Татар телендә белем бирү программасы актерлык осталыгы, вокал, сәхнә сөйләме һәм хәрәкәте дәресләрен үз эченә ала. Студия эше, нигездә, укучыларда татар теленә карата кызыксыну уятуга һәм милли мәдәниятне үстерүгә юнәлдерелгән. Шулай ук «Апуш» яшь башкаручыларга үз сәләтләрен ачарга ярдәм итә.

Июнь аенда халык шагыйре Габдулла Тукай иҗаты турында «Апушның тылсымлы төшләре» спектакле премьерасы булды. Тамашачылар арасында шәһәр Мэры Илсур Метшин һәм Татарстан Президенты каршындагы Татарстан Республикасында яшәүче халыкларның татар телен һәм туган телләрен саклау, үстерү мәсьәләләре комиссиясе рәисе Марат Әхмәтов та бар иде.

Шулай ук укыгыз

29.04.2025, 17:56

Татарстанда 23 м/с ка кадәр көчле җил көтелә
29.04.2025, 17:11

Сак булыгыз, талпаннар! Яз башыннан Татарстанда 864 талпан тешләве теркәлгән
29.04.2025, 16:43

Казанда Копылов урамында транспорт хәрәкәтен өлешчә чикләячәкләр
29.04.2025, 16:02

Казанга «Җиңү поезды» мемориаль составы киләчәк

Барлык яңалыклар