Казандагы 16 нчы шәһәр хастаханәсе стационарын капиталь ремонтлау 2024 елның беренче кварталында тәмамланачак

Сентябрь башында төзүчеләр беренче корпусның өченче катын файдалануга тапшырырга планлаштыралар

Фото: Денис Гордийко

(Казан шәһәре KZN.RU, 9 нчы август, Диана Жиленкова). Казанның Мәскәү районы 16 нчы шәһәр клиник хастаханәсе стационарын капиталь ремонтлауны 2024 елның беренче кварталында тәмамларга планлаштыралар. Бүгенге көндә эшләр 70% ка башкарылган.

Хәзер стационарның икенче корпусы һәм беренче корпусның ике каты тулысынча ремонтланган. Яңартылган биналар һәм палаталар тулысынча оргтехника, җиһазлар, суыткычлар һәм барлык кирәкле җиһазлар белән тәэмин ителгән.

Видеокүзәтү, кондиционер һәм вентиляция системалары җиһазландырылган. Янгын сигнализациясе алыштырылган. Өч лифтның икесе яңартылган. Моннан тыш, рентген компьютер томографиясе аппараты урнаштырылган һәм эшләтеп җибәрүгә әзерләнә.

Сентябрь башында төзүчеләр беренче корпусның өченче катын файдалануга тапшырырга планлаштыралар. Тагын ике кат һәм подвалны ремонтлау калып бара, дип хәбәр итә 16 нчы шәһәр клиник хастаханәсе матбугат хезмәте.

Шул ук вакытта капиталь ремонт Сугыш ветераннары госпиталендә, 2 нче клиник хастаханәдә һәм профессор К.Ш.Зыятдинов исемендәге 18 нче үзәк шәһәр клиник хастаханәсендә алып барыла.

Шулай ук укыгыз

Барлык яңалыклар