Җәйгә Казанда футболны үстерү үзәге манежын төзеп бетерергә планлаштыралар

Эшләр Россия Хөкүмәте ярдәмендә алып барыла

Казанның Копылов урамында футболны үстерү үзәгенең манеж каркасы торгызылды. Бу бинадагы барлык эшләрне җәйгә төгәлләргә планлаштыралар. Үзәк төзелеше Россия Хөкүмәте ярдәме белән алып барыла. Бу хакта «Татар-информ» мәгълүмат агентлыгында узган матбугат конференциясендә билгеле булды.

Татарстанның спорт министры урынбасары Алмаз Хөсәенов сүзләренчә, республикада халыкның 64,5% ы даими рәвештә физик культура һәм спорт белән шөгыльләнә – биш ел эчендә күрсәткеч 15% ка арткан. «Бу аспект буенча без һәрвакыт Россия төбәкләре арасында лидер булып торабыз», – дип мәгълүмат китерде спикер.

Күрсәткечнең үсүенә инфраструктураның яхшыруы – объектларны төзү һәм капиталь ремонтлау, инвентарь һәм җиһазлар сатып алу ярдәм итә. Бу эшләрне башкарырга «Спорт – тормыш нормасы» Федераль проектлары һәм «Демография» илкүләм проектының «Бизнес-спринт»ы ярдәм итә, аларны гамәлгә ашыруга быел 155 млн сум акча бүлеп бирелгән, шулай ук республика программалары да ярдәм итә.

Быел «Спорт – тормыш нормасы» проекты буенча җиһазлар китерүгә һәм инвентарь сатып алуга 38 млн сум юнәлдерелгән, шуның 23 млн сумы – федераль бюджеттан, 15 млн сумы – республика бюджетыннан. Спорт учреждениеләренә чаңгылар, йөгерү аяк-киемнәре, дзюдо өчен кимоно, фигуралы шуу өчен тимераяклар һәм башка спорт товарлары кайтты.

«Объектлар төзегәндә «Бизнес-спринт» Федераль проекты зур ярдәм күрсәтә, аның ярдәмендә 2024 елда Чаллыда һәм Әлмәттә «ФИЗРА» спорт үзәге» физкультура-сәламәтләндерү комплекслары ачылды, ә киләсе ел ахырына без Казанда һәм Яшел Үзәндә тагын шундый ике объектны төзү эшләрен төгәлләргә өметләнәбез», – дип уртаклашты спикер.

Алмаз Хөсәенов «Бизнес-спринт» проекты кысаларында Копылов урамында футболны үстерү үзәге төзелешенең дәвам итүе турында да сөйләде. Исегезгә төшерәбез, объект балалар һәм профессиональ спортчылар өчен күнекмәләрнең тулы циклын формалаштыру өчен булдырыла. Киләчәктә территориядә тагын өч мәйдан төзү планлаштырыла: икесе – сүтелгән стадион урынында һәм берсе — ябык манежда. Манеж төзелеше финал стадиясендә.

Милли проектлар республика программаларын тулыландыра, шул исәптән объектларны капиталь ремонтлау буенча да. Татарстанның спорт министры урынбасары сүзләренә караганда, төбәктә ел саен муниципаль районнарның спорт корылмаларын яңартуга 500-600 млн сумнан артык акча бүлеп бирелә. Агымдагы елда сумма 668 млн сум тәшкил иткән.

Теманы дәвам итеп, Казан Башкарма комитетының Физик культура һәм спорт комитеты рәисе урынбасары Ришат Ибәтуллин ТР башкаласында спорт объектларын яңарту һәм төзү турында искәртте.

2020 елдан 2023 елга кадәр шәһәрдә «Спорт – яшәү нормасы» проекты буенча «Тасма» стадионында йөгерү юллары алыштырылды, 16, 21, 90 нчы гимназияләр, шулай ук 130 һәм 149 нчы мәктәпләр территориясендә футбол кырлары, йөгерү юллары, физик күнегүләр ясау өчен урнаштырылган махсус җиһазлар мәйданнары булган ачык төрдәге физкультура-сәламәтләндерү комплекслары ачылды.

Шулай ук укыгыз

Барлык яңалыклар