Атна ахырына Татарстанда +7 градуска кадәр җылыначак

Иртәгә Казанда болытлы һава торышы көтелә, явым-төшемнәр фаразланмый.

Фото: Денис Гордийко

(Казан шәһәре KZN.RU, 7 нче ноябрь). Бүген төнлә һәм иртәгә көндез Казанда болытлы һава торышы көтелә, артык явым-төшемнәр фаразланмый. Көньяк-көнбатыштан уртача җил булачак. Төнлә һава температурасы 0 дән -2 градуска кадәр, көндез һава +3 градуска кадәр җылыначак.

Иртәгә, 8 нче ноябрьдә, республика антициклон перифериясендә булачак. Атмосфера фронтлары якын булу сәбәпле, урыны белән юеш кар көтелә. Төнлә һава температурасы +1 дән -4 градуска кадәр булачак, көндез +4 градуска кадәр күтәреләчәк. Татарстанның көнчыгышында юлларның кайбер участокларында бозлавык сакланачак.

Алга таба Россиянең Европа территориясенең төньяк диңгезләре буйлап хәрәкәт итәчәк атлантик циклоннары аркасында республикада җылыначак. 9 нчы һәм 10 нчы ноябрьдә болытлы һава шартларында явым-төшем – яңгыр һәм кар көтелә. 9 нчы ноябрь төнендә -3 тән +2 градуска кадәр, көндез +5 градуска кадәр булачак. 10 нчы ноябрь, якынча фаразлар буенча, төнлә +4 градуска кадәр, көндез +7 гә кадәр булачак. Әлеге чорда уртача тәүлеклек һава температурасы климат нормасыннан 3-4 градуска артып китәчәк.

11-12 нче ноябрьдә атмосфера фронтлары зонасында яңгыр көтелә. Төнлә һава температурасы 0 дән +5 градуска кадәр булачак, көндез +2 дән +7 градуска кадәр, дип хәбәр итә ТР Гидрометеорология үзәге.

Шулай ук укыгыз

Барлык яңалыклар