15 нче ноябрьгә Фучик урамында Минск урамына таба әйләнгеч юлны төзеп бетерү планлаштырыла

Моңарчы Фучик һәм Ломжа урамнары чатындагы ярык барлыкка килгән юл катламы тулысынча торгызылган.

Фото: Денис Гордийко

(Казан шәһәре KZN.RU, 24 нче октябрь, Юлия Летникова). Казанда Фучик урамында метро станцияләре төзелеше урынында әйләнгеч юлларны төзекләндерү эшләре бара. Бүгенгә Академик Завойский урамы юнәлешендә урап узучы юлны төзекләндерү тәмамланган, анда җәяүлеләр кичүе, тамгалар һәм светофор барлыкка килгән. 15 нче ноябрьгә Минск урамы юнәлешендә әйләнгеч юл төзелеше тәмамланачак, шуннан соң ике юнәлешкә дә хәрәкәт ачылачак. Бу хакта Казан Башкарма комитетында узган эшлекле дүшәмбе киңәшмәсендә «Казметрострой» АҖ генераль директоры Марат Рәхимов хәбәр итте.

«Узган атнада Фучик һәм Ломжа урамнары чатында метро станцияләре төзелеше зонасында ярык барлыкка килде. Бу кешеләр өчен куркыныч тудырмады, әмма без әзер булырга һәм тиз җавап бирергә тиеш», – дип ассызыклады Казан Башкарма комитеты җитәкчесе Рөстәм Гафаров.

Белгечләр ачыклаганча, юлдагы ярык «Зилант» станциясеннән «Академия» станциясенә кадәр барган вакытта «Айсылу» тоннель үткәргеч комплексының грунт басымы кискен кимү сәбәпле барлыкка килгән. Кыска вакыт эчендә юл катламы тулысынча торгызылган. Рөстәм Гафаров, зур эш күләмен исәпкә алып, процессны игътибар белән контрольдә тотарга, транспорт һәм җәяүлеләр хәрәкәте бозылмасын өчен штаттан тыш хәлләргә вакытында җавап бирергә кушты.

Киләчәктә грунт хәрәкәте факторын исәпкә алып, әлеге участокта ЮХИДИ таләпләре буенча транспорт хәрәкәтен чикләү турында карар кабул ителде. Хәзер автомобильләр һәм җәмәгать транспорты Фучик урамындагы йортлар буенда урнашкан ике полосалы әйләнгеч юлдан хәрәкәт итә, ә җәяүлеләр өчен тротуар төзел де.