Казанның Галиев мәчетеннән Корбан гаетен турыдан-туры трансляцияләү оештырылачак

Бәйрәмгә дистанцион рәвештә 31-нче июль 3.30 сәгатьтә кушылырга мөмкин булачак.

(Казан шәһәре KZN.RU, 30-нчы июль). 31-нче июльдә Казанның Галиев мәчетеннән Корбан гаете турыдан-туры трансляцияләнәчәк. Барлык теләүчеләр бәйрәмгә 3.30 сәгатьтән кушыла алачак.

Татарстан мөселманнары башлыгы, мөфти Камил хәзрәт Сәмигуллинның бәйрәм вәгазен һәм гает-намазны «ТНВ Татарстан», «ТНВ Планета» һәм «Хузур ТВ» телеканалларында, ТР мөселманнары Диния нәзарәтенең dumrt.ru рәсми сайтында һәм «Хузур ТВ» YouTube-каналында реаль вакыт режимында күзәтергә мөмкин булачак.

Татарстанда гает уңаеннан Галиев мәчетендә узачак төп тантаналарга 31-нче июль 3.30 сәгатьтә кушылырга мөмкин, бу вакытта Коръән уку башланачак, дип хәбәр итә ТР мөселманнары Диния нәзарәте матбугат хезмәте. Аннан соң 3.45 сәгатьтә мөфти Камил хәзрәт Сәмигуллин традиция буенча гает-вәгазь белән өммәткә мөрәҗәгать итәчәк. Җәмәгать гает-намазын 4.15 сәгатьтә күрергә мөмкин булачак.

«ТНВ Татарстан» телеканалында трансляцияне кабатлап күрсәтү 31-нче июль 15.05 сәгатьтә, «ТНВ Планета» телеканалында 12.20 сәгатьтә булачак. Моннан тыш, 9.00 сәгатьтә Галиев мәчетеннән гает язмасын «Россия 1» телеканалыннан карарга мөмкин булачак.

Искәртеп үтәбез, 4.30 сәгатьтә мөселманнар корбан чалуга керешә алачак. Казанда өч көн дәвамында махсус билгеләнгән 15 урында корбан чалырга мөмкин булачак.

Шулай ук укыгыз

Барлык яңалыклар