Иван Дмитриенко «Киләчәк уеннары» гимнының ничек барлыкка килүе турында сөйләде

Бүген Казанда мультиспорт турнирының тантаналы ачылышы булачак

Фото: Денис Гордийко

Бүген «Киләчәк уеннары»н ачу тантанасында мультиспорт турниры гимнын музыкант Иван Дмитриенко һәм DJ Smash башкарачак.

«Гимнның жанры «смешча» дисәк тә була, әгәр андый бар икән. Биюле, динамик, оптимистик. Без «Киләчәк уеннары» гимнын ике тапкыр яңадан яздырдык, башта үзем яздырдым, әмма Андрейга (ред. иск. – DJ Smash) анысы ошамады. Икенче тапкыр без төрле алымнар эзләдек һәм алтын урталыкны табуга ирештек. Гимнны кешеләрнең йөрәкләренә үтеп керерлек итеп җырларга кирәк иде – мин аны җырлаганнан соң оныта алмыйм», – дип билгеләп үтте Иван Дмитриенко.

Ул журналистларга чыгыш алдыннан дулкынлануын һәм мультиспорт турнирын ачу тантанасында тамашачыларда яхшы тәэсир калдырырга өметләнүен җиткерде.

«Бүген монда чыгыш ясау минем өчен бик дулкынландыргыч. Әлеге вакыйганың әһәмиятлелеген, аның никадәр уникаль булуын бөтен кеше дә аңлый. Номерыбызны үзебез уйлаган дәрәҗәдә башкарып чыгарбыз дип өметләнәм. Гимнны җырлап, «Киләчәк уеннары»н ачам бит мин – бик мөһим һәм җаваплы бурыч. DJ Smash белән тиешле дәрәҗәдә чыгыш ясарбыз һәм яхшы тәэсир калдырырбыз дип уйлыйм», – дип ассызыклады спикер.

Исегезгә төшерәбез, ярышларны ачу тантанасын Беренче канал күрсәтәчәк.

Шулай ук укыгыз

Барлык яңалыклар