Ирина Роднина «Йөзьяшәрләр уеннары. Яшәү яме» спартакиадасын ябу тантанасында автограф-сессия үткәрәчәк

Чарада бүләкләр уйнату, зумба-зарядка һәм Эльмира Кәлимуллина чыгышы планлаштырылган

Фото: Денис Гордийко

16 нчы майда «Хезмәт резервлары» стадионында «Йөзьяшәрләр уеннары. Яшәү яме» спартакиадасын ябу тантанасы узачак, анда ярышларда җиңүчеләрне һәм призерларны бүләкләячәкләр. Чарада Казан мэры Илсур Метшин, фигуралы шуучы, өч тапкыр Олимпия чемпионы Ирина Роднина һәм ТРның спорт ветераннары катнашачак.

Тамашачылар өчен мәдәни-күңел ачу программасы әзерләнгән. Сәхнәдә ТРның халык артисты Эльмира Кәлимуллина, «Премьер» триосы һәм «Болгар кызлары» чыгыш ясаячак. Концерттан тыш, бәйрәмдә зумба-зарядка һәм тамашачылар арасында бүләкләр уйнату узачак. Лотереяның приз фонды 30 мең сумны тәшкил итә, шулай ук смартфон, төньяк йөреше өчен таяклар, футбол туплары, массажер оту мөмкинлеге бар. Ә Ирина Роднинадан автограф-сессия планлаштырылган.

Кунакларны 10:30 сәгатьтә Николай Ершов урамы, 7а адресы буенча көтәләр. Керү ирекле, әмма урыннар саны чикләнгән. Белешмәләр өчен телефон: +7(843)223-19-36.

Исегезгә төшерәбез, спартакиада узган елның октябрендә старт алды. Сезон дәвамында «йөзьяшәрләр» спортның 10 төрендә: йөзү, волейбол, футбол, өстәл теннисы, дартс, җиңел атлетика кроссы, чаңгы ярышлары, шахмат, төньяк йөреш һәм ГТО буенча көч сынашты.

Ярышлар Казанның барлык районнарыннан 3 меңнән артык кешене берләштергән. Беренче сезонда 35 спорт объекты җәлеп ителгән, 1 меңнән артык медаль һәм 100 кубок уйнатылган.

Шулай ук укыгыз

Барлык яңалыклар