Интерактив әкият һәм бәйрәм концерты: 20 нче декабрьдә «Казан» гаилә үзәгендә чыршы бәйрәме ачыла

Кунаклар алдында «Болгар кызлары», Yuki, Игнат Изотов, Ландыш Нигъмәтҗанова һәм Анастасия Макарова чыгыш ясаячак.

Фото: Денис Гордийко

(Казан шәһәре KZN.RU, 19 нчы декабрь). «Казан» гаилә үзәге янындагы 35 метрлы үзәк шәһәр чыршысы иртәгә 20 нче декабрьдә ачыла. ТР башкаласында яшәүчеләрне һәм кунакларны интерактив программа, музыкантлар һәм аниматорлар чыгышлары көтә.

Интерактив программада балалар «Кар патшабикәсе өчен бүләк» әкиятендә катнаша, әйлән-бәйләндә йөри һәм спектакль геройлары белән кышкы уеннарда уйный алачак. Төп геройлар (Снегоняшалар) Кар патшабикәсен яхшы персонажга әйләндерү өчен сәяхәткә кузгалачак. Ә Кыш Бабайның яшерен бүләкләр фабрикасы турында «Болтун» кар бабай сөйләячәк.

Концерт программасының хедлайнерлары «Болгар кызлары», Yuki, Игнат Изотов, Ландыш Нигъмәтҗанова һәм Анастасия Макарова булачак.

Мәйданда балалар өчен аттракционнар да булачак. Ә аниматорлар тылсымлы сандыктан бүләкләр белән уеннар тәкъдим итәчәк.

«Казан» гаилә үзәге янында «КышДаКар-фест» фестивале кысаларында бәйрәм сәүдә рәтләре дә оештырылачак. Павильоннарны шәһәр символикасы һәм иллюминациясе белән бизәячәкләр.

Чара 17:00 сәгатьтә башлана, дип хәбәр итә Казан Башкарма комитетының Мәдәният идарәсе.

Шулай ук укыгыз

Барлык яңалыклар