Казанда профессор Давыд Менделевич исемендәге стипендия тапшырачаклар

Стипендияне тапшыруда практик психиатрлар һәм фән вәкилләре чыгыш ясаячак.

(Казан шәһәре KZN.RU, 12-нче февраль). 17-нче февральдә Казанда Татарстанның атказанган табибы Давыд Менделевич исемендәге стипендия тапшырачаклар. Әлеге стипендиягә танылган психиатр эшләгән Казан дәүләт медицина университеты (КДМУ) аспирантлары һәм ординаторлары номинацияләнгән.

Стипендияне тапшыруда практик психиатрлар һәм фән вәкилләре чыгыш ясаячак. Аерым алганда, аутистик спектрда тайпылышлар булган балаларда социаль аффектны бозуның чагылышына коммуникатив күнекмәләрнең йогынтысы, төрле тел төркемнәре пациентларында тавыш галлюцинацияләре тәҗрибәсе һәм башкалар кебек мәсьәләләр күтәреләчәк, дип хәбәр итә Казан дәүләт медицина университетының матбугат хезмәте.

Стипендия югары уку йортының иң яхшы студентларына укудагы һәм фәнни эштәге аерым уңышлары өчен икенче ел рәттән бирелә. Узган ел Давыд Моисеевичның туган көнендә Казан дәүләт медицина университетында аның исемендәге лекция аудиториясе ачылды. 2019 елда премиягә КДМУ психиатрия кафедрасының ординаторы Элина Мөхәммәтшина һәм югары уку йортының медицина һәм гомуми психология кафедрасы аспиранты Иван Митрофанов ия булды.

Белешмә

Давыд Менделевич 60 елдан артык гомерен психиатриягә багышлый. Ул 230-га якын фәнни эш, шул исәптән 7 монография һәм уку әсбабы язган. Аның җитәкчелегендә 4 докторлык һәм 17 кандидатлык диссертациясе якланган.

Шулай ук укыгыз

Барлык яңалыклар