Илсур Метшин Казан шәһәре Думасының XXXIII сессиясендә республика һәм шәһәр бүләкләрен тапшырды

Казанлылар ТР Президенты Рәхмәт хатлары, шәһәр алдындагы хезмәтләре өчен мактау грамоталары алдылар.

(Казан шәһәре KZN.RU, 18-нче апрель, Алена Мирошниченко). Бүген Ратушада уза торган Казан шәһәре Думасының XXXIII сессиясе утырышында Казан Мэры Илсур Метшин шәһәр үсешенә зур өлеш керткән казанлыларга республика һәм шәһәр бүләкләрен тапшырды.

Мэр депутатларга РФ Эчке эшләр министрлыгының Казан буенча идарәсенең яңа башлыгы Александр Мищихинны тәкъдим итте. Намуслы хезмәте өчен рәхмәт сүзләрен шәһәр башлыгы элек бу вазифаны биләгән Алексей Соколовка җиткерде, ул ТР буенча Эчке эшләр министры урынбасары – полиция башлыгы итеп билгеләнгән иде. Шәһәр башлыгы кулыннан ул Казанның Мактау грамотасын алды.

«Безнең коллегабызга авыр вакытларда шәһәр халкының һәм кунакларының иминлеген тәэмин итүгә керткән өлеше өчен рәхмәт белдерәм, без Конфедерацияләр Кубогына һәм футбол буенча дөнья чемпионатына әзерләнгәндә, йөзләгән мең кунак каршы алдык, - дип билгеләде И. Метшин. – Сезнең исемдә бөтен Казан гарнизонына башкарган эшләре өчен рәхмәт әйтәсем килә. Сезнең хезмәт элеккечә куркыныч та, авыр да». Мэр ТР буенча Эчке эшләр министрлыгына аерым рәхмәтен белдерде.

«Мин берничә ел дәвамында иң профессиональ команданың бер өлеше булганым белән горурланам, - диде А.Соколов һәм иминлек һәм хокук тәртибе мәсьәләләренә бирелгән игътибар өчен депутатлар корпусына һәм Башкарма комитет җитәкчеләренә рәхмәт белдерде.

Сессиядә Казанның Авиатөзелеш һәм Яңа Савин районнары администрациясенең төзекләндерү бүлеге башлыгы Юлия Князевага «Татарстан Республикасының атказанган торак-коммуналь хуҗалыгы хезмәткәре» дигән мактаулы исем бирелде.

Транспорт комитеты рәисе Айдар Габделхаковка, «Водоканал» муниципаль унитар оешмасы директоры Андрей Егоровка ТР Президенты Рәхмәте белдерелде.

Намуслы хезмәте һәм актив җәмәгать эшчәнлеге өчен «Бердәм Россия» Бөтенроссия сәяси партиясенең Татарстан төбәк бүлеге башкарма комитеты җитәкчесе Андрей Кондратьевны, озак еллар намуслы хезмәте һәм футбол буенча дөнья чемпионатын үткәрүгә керткән өлеше өчен, спорт һәм социаль проектлар дирекциясе генераль директоры урынбасары Михаил Леоновны, 12-нче номерлы Шәһәр клиник хастаханәсе шәфкать туташы Нурия Тимергалееваны Казанның Мактау грамоталары белән бүләкләделәр.

Фоторепортаж

Казан шәһәре Думасының XXXIII сессиясе, 18.04.2019

Шулай ук укыгыз

Барлык яңалыклар