Илсур Метшин мәктәп укучылары белән бергә «Салават күпере» торак комплексында урнашкан яңа парк территориясендә шомырт үсентеләре утыртты

Җәмәгать киңлегендә барлыгы 400 эре агач барлыкка киләчәк.

Фото: Денис Гордийко

(Казан шәһәре KZN.RU, 23-нче сентябрь, Алинә Бережная). Бүген Казан Мэры Илсур Метшин 188-нче номерлы «Бионика» лицее һәм 189-нчы номерлы «Заман» гимназиясе укучылары белән «Салават күпере» паркында 15 төп шомырт үсентесе утыртты. Гомумән алганда, биредә 400 эре үлчәмле үсемлек –тирәк, өрәңге, алмагач, каен һәм башкалар утыртылачак.

«Бүген без укучылар белән агач утыртуган кушылганыбыз өчен шатмын, сентябрь ахыры һәм октябрь башы – моның өчен иң уңышлы вакыт», – дип билгеләде Илсур Метшин. Аның сүзләренә караганда, территорияне яшелләндерү булачак паркны яхшыртачак һәм аны тагын да уңайлырак итәчәк. «Бушлык урынында без 6,5 га территориядә урнашачак парк төзелешен башладык. Аны төзү өчен вакыт кирәк булачак, ахыр чиктә «Салават күпере» халкының балалар мәйданчыклары, җәяүлеләр өчен зоналары, урындыклары һәм яктырткычлары булган җәмәгать киңлеге барлыкка киләчәк», – дип искәртте Мэр.

Шәһәр башлыгына агачларны 188-нче номерлы лицейның 8 «А» сыйныф укучысы Азамат Ильясов һәм 189-нчы номерлы «Заман» гимназиясенең 10 «А» сыйныф укучысы Айдар Сәлахов утыртырга булышты. Мәктәп укучылары, элек сазлык булган урында төзелә торган паркны төзекләндерүгә үз өлешләрен кертергә шат булулары турында белдерделәр. «Парк мәктәп янында ук урнашкан, шуңа күрә дәресләрдән соң монда йөрергә мөмкин булачак. Барлык эшләрнең дә тәмамлануын түземсезлек белән көтәбез, – дип мөрәҗәгать итте шәһәр башлыгына Азамат Ильясов.

Тирәк, карама, нарат, өрәңге, каен, алмагач, шомырт кебек агач токымнары аларның чәчәк атуын исәпкә алып сайланды. Республиканың Лаеш районы питомнигыннан үсентеләр кайтарылды. Агачларны «Горводзеленхоз» МУП белгечләре караячак. Хәзер яңгырлар аркасында үсентеләр даими су сибүгә мохтаҗ түгел. Яз, җәй һәм көз көннәрендә аларны махсус ашлама белән тукландырачаклар.

Шулай ук булачак парк территориясендә газон җәя башлаганнар.

Парк төзелеше нәтиҗәләрен микрорайонда яшәүчеләр бәяли ала. Биредә инженерлык челтәрләре ясалган, яңгыр сулары канализациясе урнаштырылган, видеокамералар, яктырту баганалары, автоматик су сибү системасы, модульле санузел урнаштырылган, җәяүлеләр өчен юллар булдырылган.

Исегезгә төшерәбез, яңа парк Наил Йосыпов һәм Әлфия Авзалова урамнары киселешендә урнашкан. Концепция нигезендә, җәмәгать киңлеге өч тематик зонага бүленгән: тыныч ял һәм күзәтүләр өчен, активлык һәм экстрим өчен, шулай ук парад мәйданы.

Актив ял итү зонасының беренче чиратын төзү тәмамланды.

Агач утыртуда Башкарма комитет җитәкчесе урынбасары Игорь Куляжев, Киров һәм Мәскәү районнары администрациясе башлыгы Сергей Миронов, Парклар һәм скверлар дирекциясе җитәкчесе Роберт Гарипов, Мәгариф идарәсе башлыгы Ирек Ризванов, Тышкы төзекләндерү комитеты рәисе Игорь Сәләхетдинов катнашты.