Илсур Метшин: «Хәйрия проектларына җан җылыгызны кушып, сез бу дөньяны яхшырак итәргә омтыласыз»

Казан Мэры Казан волонтерларын Үзиреклеләр көне белән котлады.

Фото: Казан шәһәре KZN.RU

(Казан шәһәре KZN.RU, 5-нче декабрь). Казан Мэры Илсур Метшин Казан волонтерларын Үзиреклеләр көне белән котлады.

«Хөрмәтле волонтерлар!

Казанның барлык инициативалы һәм җаваплы халкын Үзиреклеләр көне белән чын күңелдән котлыйм!

Хәйрия проектларына җан җылысын кушып, сез җәмгыятькә ихластан хезмәт итәсез һәм бу дөньяны яхшырак итәргә омтыласыз. Йөрәк кушуы буенча ярдәм итеп һәм катнашып, сез үз шәхси эшегезне читкә куясыз һәм ярдәм аеруча кирәк булган кешеләргә игътибар итәргә ашыгасыз. Сезнең ачыклык һәм эчке ныклыгыгыз тирән ихтирамга һәм рәхмәткә лаек.

Волонтерлар хәрәкәте Казан тормышының мөһим һәм аерылгысыз өлешенә әверелде һәм елдан-ел яңа өлкәләргә тарала. 2020 ел бөтен дөнья өчен дә, безнең шәһәр өчен дә глобаль үзгәрешләр китерде. Сезнең, Казан үзиреклеләре ярдәме белән, март аенда #МыВместе үзара ярдәм акциясе башланып китте, ул бүгенге көнгә кадәр дә дәвам итә. Бу чорда авыр тормыш хәлендә калган дистәләгән мең кеше ярдәм алды. Шәһәр халкы да, оешмалар да, Казанның игелекле кешеләр шәһәре булуын раслап, ярдәм күрсәтү эшенә кушылды.

Барлык волонтерларга Татарстан башкаласында хәйриячелек культурасын үстерүгә керткән бәяләп бетергесез өлеше өчен рәхмәт белдерәм.

Чын күңелдән сезгә игелекле һәм әһәмиятле эшегездә уңышлар, нык сәламәтлек, көч, энергия һәм яңа идеяләрне тормышка ашыруыгызны телим! Сезнең лаеклы үрнәгегез тагын да күбрәк кешеләрне илһамландырсын!» - диелә котлауда.

Шулай ук укыгыз

Барлык яңалыклар