Илсур Метшин: « «Заря» скверы Казан тарихының истәлекле битләрен яктыртты»

Җәмәгать киңлегендә йөрү зонасын төзекләндерделәр һәм шәһәр тормышындагы иң мөһим вакыйгаларга багышланган мәгълүмат стендлары урнаштырдылар

Узган ел ахырында Заря урамында йөрү зонасы төзекләндерелгән иде. Аның белән янәшә ял итү зоналары, футбол кыры һәм балалар мәйданчыклары урнашкан. Скверда шулай ук эскәмияләр, чүп савытлары, таганнар урнаштырдылар, яктырту челтәрләре үткәрделәр, брусчатка җәйделәр һәм якынча 200 төп агач утырттылар.

Һәм, ниһаять, күптән түгел генә скверда, юкә һәм миләш агачлары күләгәсендә, халыкны Казанның масштаблы вакыйгалары һәм бөек кешеләре белән таныштыра торган мәгълүмати стендлар барлыкка килде. Шулай итеп, стендлар XXVII Бөтендөнья җәйге универсиада, «Гасырлар кайтавазы» шәҗәрә фестивале, Бөек Ватан сугышы герое Михаил Девятаев һәм башка билгеле исемнәр һәм тарих битләре турында сөйли.

«Тротуар һәм утларсыз, үлән каплаган зонада очрашулар һәм йөрү өчен яңа яшел урын барлыкка килде. Шәһәрдә мондый мәйданнар артканнан-арта бара. Һәрберсенең үз үзенчәлеге булуы сөендерә. Һәр мондый урынны халык җылы кабул итә. Ә монда хәзер йөреп кайту гына түгел, ә шәһәр тарихы турында күбрәк белергә дә мөмкин», – дип билгеләп үтте Казан мэры Илсур Метшин.

Исегезгә төшерәбез, 2024 елда Казанда 18 җәмәгать киңлеген төзекләндерәчәкләр. Парк һәм скверларда йөрү юлларын, коймалар, яктырту системаларын, парк җиһазларын яңарталар, өстәмә агач һәм куаклар утырталар.

Шулай ук укыгыз

Барлык яңалыклар