Ильсур Метшин: «Киләсе елда бары тик яхшы яңалыклар, шатлыклы хәбәрләр генә булсын»

Казан Мэры шәһәр халкын якынлашып килүче 2021 ел белән котлады.

Фото: Казан шәһәре KZN.RU

(Казан шәһәре KZN.RU, 31-нче декабрь). Казан Мэры Илсур Метшин шәһәр халкын якынлашып килүче 2021 ел белән котлады.

«Хөрмәтле казанлылар!

Сезне чын күңелдән якынлашып килүче 2021 ел белән котлыйм!

Иң көтеп алынган гаилә бәйрәме безгә туганнар һәм кадерле кешеләр белән очрашырга, җылылык һәм игътибар белән бүлешергә, нәтиҗәләр ясарга һәм теләкләргә ирешергә мөмкинлек бирә.

Казанга Бөек Җиңүнең 75 еллыгы һәм ТАССР төзүленең 100 еллыгы истәлекле елында өлкән буын батырлыгына лаеклы хөрмәт күрсәткән «Хезмәт батырлыгы шәһәре» мактаулы исеме бирелде. Безнең өчен алдагы буыннарның тиңдәшсез батырлыгын истә тоту һәм киләчәк буыннарга Бөек Ватан сугышы турында изге истәлек тапшыру мөһим.

Узып баручы елда меңләгән казанлы уңай үзгәрешләр кичерде: торак йортларны, балалар бакчаларын һәм мәктәпләрне капиталь ремонтлау һәм төзү, ишегалларын һәм яраткан ял зоналарын төзекләндерү Татарстан башкаласында тормыш сыйфатын күтәрде. Казанның көннән-көн камилләшә баруы – безнең бай тарихлы гүзәл шәһәребезне ихлас яратучы халыкның уртак эш нәтиҗәсе һәм сакчыл мөнәсәбәте.

Киләсе елны без мөһим проектларны һәм программаларны гамәлгә ашыру буенча гаять зур планнар белән бәйлибез. Уртак тырышлык белән без аларны тормышка ашырырбыз дип ышанам!

Сезгә чын күңелдән бәйрәм рухы һәм тылсымлы Яңа ел төнендә теләкләрнең чынга ашуын телим! Киләсе елда бары тик яхшы яңалыклар, шатлыклы хәбәрләр генә булсын.

Яңа, 2021 елда сәламәт һәм бәхетле булыгыз!» – диелә котлауда.

Шулай ук укыгыз

Барлык яңалыклар