Илсур Метшин спорт мәктәпләре укучыларының потенциалын диагностикалауның яңа системасы белән танышты

Проект стартында бушлай тест алты спорт төре буенча үткәрелә: җиңел атлетика, йөзү, чаңгы ярышлары, спорт көрәше, дзюдо һәм бокс.

Фото: Денис Гордийко

(Казан шәһәре KZN.RU, 18-нче март, Алинә Бережная). Быелдан башлап Казанда Идел буе дәүләт физик культура, спорт һәм туризм академиясенең укыту-диагностика үзәге базасында балалар спорт мәктәпләре укучыларын бушлай тестлаштыру башланды. Заманча технологияләр нигезендә диагностика баланың билгеле бер спорт төренә карата сәләтен өйрәнергә, шулай ук ярышларга нәтиҗәле әзерләнергә мөмкинлек бирә. Беренчеләрдән булып алты спорт төре буенча 14-16 яшьлек балалар-яшүсмерләр спорт мәктәпләрендә тәрбияләнүчеләр сыналачак: җиңел атлетика, йөзү, чаңгы узышы, спорт көрәше, дзюдо һәм бокс. Бүген Казан Мэры Илсур Метшин укыту-диагностика үзәге эше белән танышты.

Казан Мэры берничә бүлектә һәм лабораториядә булды, аерым алганда, антропология бүлегендә, анда спортчының мускул массасы авырлыкка, буйга нисбәттә үлчәнә, шулай ук теге яки бу спорт күнегүләрен дөрес үтәү теркәлә торган биомеханика лабораториясендә. Биохимия лабораториясендә спортчының йөкләнеше дәрәҗәсен күзәтәләр, ә функциональ диагностика лабораториясендә чыдамлыкка сынау уздырыла.

«Универсиада мирасы иртәгесе көнгә, балалар сәламәтлегенә һәм аларның спорт нәтиҗәләренә эшли. Без, әти-әниләр, үз балаларыбызны чемпионнар итеп күрергә телибез. Мондый уку үзәкләре ярдәмендә ата-аналар һәм тренерлар баланың үсешен күзәтә ала», – дип билгеләп үтте шәһәр башлыгы.

Академия каршындагы укыту-диагностика үзәге Универсиада-2013 алдыннан ачылды. Учреждениедә спорт резервын әзерләү технологияләрен камилләштерү өстендә эшлиләр һәм ярышлар алдыннан спортчыларның тренировка процессын күзәтергә һәм коррекцияләргә мөмкинлек бирүче физик культура һәм спорт өлкәсендә тикшеренүләр үткәрәләр.

«Безнең үзәктә төрле лабораторияләр бар, алар ничек тә булса бер-берсенә бәйле. Спортчылар белән үз эшенең осталары – табиблар һәм физиологлар эшли», – дип сөйләде Казан Мэрына академиянең спорт резервын әзерләү технологияләренең укыту-фәнни үзәге директоры вазыйфаларын башкаручы Алексей Набатов.

Бу елдан шәһәр спорт мәктәпләре укучыларына да диагностика үткәрергә карар кылынды. Балаларны тикшергән өчен ата-аналардантүләү алынмый. Спорт үсеше траекториясен формалаштыру өчен һәр яшь спортчы елга өч тапкыр сыналачак. Беренче диагностиканы «Тасма» олимпия резервы спорт мәктәбендә тәрбияләнүчеләр үтте.

«Диагностикалау тренер ачыклый алмый торган йомшак нокталарны билгеләргә мөмкинлек бирә», – дип ассызыклады физик культура һәм спорт комитеты рәисе Альберт Салихов.

Чарада шулай ук Идел буе дәүләт физик культура, спорт һәм туризм академиясе ректоры вазыйфаларын башкаручы Рафис Борһанов катнашты.