Илсур Метшин җылыту сезонына әзерлек турында: «Мәсәлдәге кебек, борылып карарга өлгермәячәкбез, әзерлек паспортын күрсәтергә кирәк булачак»

Торак фондын һәм социаль учреждениеләрне кышка әзерләү 55% тан артыгракка үтәлгән

Казанда торак фонды һәм социаль учреждениеләрнең кышка әзерлеге 55% һәм 57% тәшкил итә. Расланган җәдвал буенча җылылык челтәрләрен һәм җиһазларны пресслау үткәрелгән инде. 15 сентябрьгә кадәр кулланучылар булачак җылыту сезонына әзерлекләрен расларга тиеш. Бу хакта эшлекле дүшәмбедә шәһәр Башкарма комитеты җитәкчесе урынбасары Искәндәр Гыйниятуллин хәбәр итте.

«Район башкарма комитеты һәм хакимият башлыклары өчен иң беренче бурыч – җылылык сезонына бөтен җаваплылык белән әзерләнү. Мәсәлдәге кебек, борылып карарга өлгермәячәкбез, әзерлек паспортын күрсәтергә кирәк булачак», — дип билгеләде шәһәр мэры Илсур Метшин.

Быел җылылык кулланучыларны кышка әзерләү РФ Энергетика министрлыгы боерыгы кысаларында алып барыла. Хәзер муниципалитетка коммерциячел оешмаларын да кертеп, барлык кулланучыларның әзерлеген тикшерүнең өстәмә функцияләре йөкләнгән. Барлыгы 16 меңнән артык абонентны, шул исәптән 6 мең күпфатирлы йортны, бюджет өлкәсенең 900гә якын объектын һәм 9 меңнән артык башка кулланучыны тикшерергә кирәк булачак.

«Элек безнең җаваплылык зонасына торак һәм социаль объектлар керә иде, бүгенге көндә муниципалитет коммерциячел объектларны әзерләүне тикшерү өчен дә җаваплы. Дөрес, закон чыгаручы моны берничек тә акча белән ныгытмады. Безнең үз техник күзәтүебез юк, ә тикшерү өчен җитди структура җавап бирергә тиеш, бездә андый органнар юк иде, әмма һәрвакыттагыча бу эшне башкарып чыгарырга кирәк булачак – башкача булмый. Торак һәм социаль объектларга килгәндә, безгә аңлашыла, ә кулланучылар базары комитетында коммерциячел объектларны тикшерү район администрациясе башлыклары өстендә, әлбәттә шәһәр Башкарма комитеты җитәкчесе җитәкчелегендә», — дип өстәде шәһәр башлыгы.

Җылыту сезонына әзерләнү белән бергә 31,6 км җылыту һәм кайнар су челтәрләре ремонтлана. Бүгенгә 20 километрга якын тышкы җылыту һәм кайнар су белән тәэмин итү челтәре алыштырылган һәм төзекләндерелгән, бу 63% ны тәшкил итә.

Шәһәр Башкарма комитеты җитәкчесе урынбасары шулай ук оешма һәм предприятие җитәкчеләренә җылыту чорына әзерлек эшләрен көчәйтергә кирәклеге турында мөрәҗәгать итте.