Илсур Метшин: «Башка төбәкләрдә «Кунакчыллык йолдызлары» белән кызыксыну эчке туризмның әһәмиятен арттыра»

Казан Себер һәм Ерак Көнчыгыш шәһәрләре ассоциациясенә конкурсны оештыруда катнашырга тәкъдим итте

Фото: Марат Мөгыйнов

(Казан шәһәре KZN.RU, 9 нчы октябрь, Камилә Вилданова). Себер һәм Ерак Көнчыгыш шәһәрләре ассоциациясе Казанның «Кунакчыллык йолдызлары» һөнәри осталык конкурсы белән кызыксына, ул соңгы елларда шәһәр кысаларыннан чыгып, төбәкара статуска ия булды. Татарстан башкаласы ассоциациягә быел проектны оештыруда катнашырга тәкъдим итте.

«Безнең «Кунакчыллык йолдызлары» конкурсы белән башка төбәкләрдә дә кызыксыну аның популярлык казануы һәм эчке туризм базарының үсеше турында сөйли. Аңлашыла ки, Мәскәү, Санкт-Петербург, Сочи кебек шәһәрләр һәрвакыт булган, ләкин без бу юлны чыгу туризмы турында сөйли башлауга беренче булып үттек. Бүгенге көндә тармак өчен кызыксыну – зур плюс. Бу һәрвакыт тәҗрибә уртаклашу һәм профессиональ дәрәҗәне күтәрү. Иң яхшы практикаларны, кейсларны башка шәһәрләргә тарату мөһим», – дип аңлатма бирде эшлекле дүшәмбедә Казан Мэры Илсур Метшин.

«Кунакчыллык йолдызлары» туристлык, ресторан һәм кунакханә индустриясе предприятиеләре хезмәткәрләре арасында II төбәкара һөнәри осталык фестивалендә Идел буе шәһәрләре генә түгел, Идел буе федераль округы чикләреннән тыш муниципалитетлар да катнашачак. Казан Башкарма комитетының Туризмны үстерү комитеты рәисе Дарья Санникова хәбәр иткәнчә, Ярославль, Ижевск, Әстерхан, Киров, Түбән Новгород, Самара һәм Волгоград предприятиеләре теләк белдергән. Гаризалар 1 нче ноябрьгә кадәр кабул ителә.

Быел конкурс номинацияләре саны 10 га кадәр артты. Кунакчыллык өлкәсендә яшь белгечләргә ярдәм итү турында карар кабул ителде. Мәсәлән, югары һәм урта уку йортлары студентларының «Күтәрелә торган йолдыз. Эчке һәм керү туризмы менеджеры» номинациясе буенча гариза бирү мөмкинлеге барлыкка килде.

Фото: Денис Гордийко