Илдар Баязитов «#БезБергә» гомумроссия акциясен оештыруга керткән өлеше өчен медаль алды

Бүләкләү тантанасы Мәскәүдә узды.

(Казан шәһәре KZN.RU, 28-нче август). «Ярдәм» милли ислам хәйрия фонды советы рәисе Илдар Баязитовка «#БезБергә» гомумроссия үзара ярдәм акциясен оештыруга керткән зур өлеше өчен медаль тапшырдылар. Бүләкләү тантанасы Мәскәүдә узды. Бүләкләрне Россия Федерациясе Президенты администрациясе җитәкчесенең беренче урынбасары Сергей Кириенко тапшырды.

«Авыр вакытта хәлләре тагы да читенрәк булган кешеләр турында уйларга кирәк. Бу безне якынайтты һәм волонтерларның күпкырлы характерын ачты. Без милли, конфессиональ чикләргә бәйсез рәвештә ярдәм күрсәттек. Студентлар гына түгел, пандемия чорында эшләмәгән кибетләр, предприятиеләрнең директорлары да волонтерлар булды», – дип сөйләде журналистларга Илдар Баязитов тантанадан соң.

Сергей Кириенко сүзләренчә, «Ярдәм» хәйрия фонды эше матди ярдәм күрсәтүгә генә юнәлтелмәгән, ә кешеләргә һәм яхшылыкка ышанычны ныгытуга йөз тота.

21-нче мартта «#БезБергә» акциясе старт алды, аны dobro.ru, Гомумроссия халык фронты һәм волонтерлык оешмалары оештырды. Проект коронавирус пандемиясе вакытында өлкән яшьтәге, аз хәрәкәтле гражданнарга һәм медицина хезмәткәрләренә ярдәм итүгә юнәлдерелгән. Россиянең барлык төбәкләрендә волонтерлар эшли, алар дарулар һәм продуктлар китерә, юристлар һәм психологлар бушлай консультацияләр үткәрә, ә акциянең меңләгән партнерлары мохтаҗларга хезмәт күрсәтүләр һәм товарлар белән ярдәм итә. Акция сайты мәгълүматлары буенча, бөтен ил буенча 119 мең волонтер 3 млн 450 мең кешегә ярдәм иткән.

Шулай ук укыгыз

Барлык яңалыклар