«Киләчәк уеннары» турниры «Знание» җәмгыяте премиясендә елның мәгърифәтчелек проекты дип танылды

Конкурска Россиянең барлык төбәкләреннән һәм 34 илдән барлыгы 18 меңнән артык гариза бирелгән

Фото: Денис Гордийко

«Киләчәк уеннары» халыкара мультиспорт турниры Россиянең «Знание» җәмгыяте конкурсы нәтиҗәләре буенча елның мәгърифәтчелек проекты булды. Премия нәтиҗәләре Мәскәүдә ясалды. Быел ярышларда катнашу өчен илнең барлык төбәкләреннән һәм 34 дәүләттән 18 меңнән артык гариза бирелгән.

«Киләчәк уеннары» турниры «Спорт һәм сәламәт яшәү рәвеше» өлкәсендә мәгарифкә керткән өлеш өчен» номинациясендә билгеләп үтелде. Шул ук компетенциядә Медиа футбол лигасы президенты Николай Осипов җиңгән. Башка номинантлар арасында «Красная машина» хоккейчыларны әзерләү илкүләм программасы, «КХЛ белән хоккей дәресе» проекты һәм «Мишки на сервере» документаль сериалы бар. Катнашучыларны РФ сәламәтлек саклау министры Михаил Мурашко бүләкләгән һәм котлаган.

Җиңүчеләрне барлыгы 19 номинациядә билгеләгәннәр, бу узган ел белән чагыштырганда алтыга күбрәк. Премия лауреатларын жюри һәм ил халкы сайлаган – халык тавыш бирүендә 120 меңнән артык кеше катнашкан.

Премия 2021 елда педагоглар, лекторлар, авторлар, блогерлар, фәнне популярлаштыручылар һәм башка мәгариф эшлеклеләре казанышларын тану максатыннан булдырылган, дип билгеләп үтелә «Знание» җәмгыяте сайтында.

Исегезгә төшерәбез, «Киләчәк уеннары» Казанда 21 нче февральдән 3 нче мартка кадәр уза. Турнирда 107 илдән 2 меңнән артык спортчы катнаша. Ярышларны ачу тантанасында Россия президенты Владимир Путин катнашты. Үз чыгышында ул чараны оештыруның югары дәрәҗәсен билгеләп үтте.

Шулай ук укыгыз

Барлык яңалыклар