И.Метшин: «Төзелешкә һәм объектларны файдалануга тапшыруга рөхсәт бирү статистикасы безнең төзелеш комплексының һәм тулаем икътисадның торышы турында ачык сөйли»

Узган елны Татарстан башкаласында 1,3 миллион квадрат метрдан артык торак файдалануга тапшырылган

Марат Мөгыйнов фотосы

Казанда 2025 ел нәтиҗәләре буенча 1,31 миллион квадрат метрдан артык торак файдалануга тапшырылган, бу торак төзелеше буенча планны 100 проценттан артыгракка үтәргә мөмкинлек биргән. Бер үк вакытта шәһәрдә мәктәпләр, балалар бакчалары, медицина учреждениеләре, кунакханәләр һәм транспорт инфраструктурасы объектлары тапшырылган. Бу хакта аппарат киңәшмәсендә Шәһәр төзелешенә рөхсәт бирү идарәсе башлыгы Марсель Габделхаков сөйләде.

«Төзелешкә һәм объектларны файдалануга тапшыруга рөхсәт бирү статистикасы безнең төзелеш комплексының һәм тулаем икътисадның торышы турында ачык сөйли. Төзелеш – ул һәрвакыт лакмус кәгазе. 2025 елда 175 эре объект – торак йортлар, социаль объектлар, административ биналар, сәнәгать предприятиеләре, фехтования мәктәбе, Киров районы суды һәм башка объектлар файдалануга тапшырылган. Барысын да санап бетереп булмый», - дип билгеләп үтте Казан мэры Илсур Метшин.

Ел дәвамында әлеге юнәлештә эшли торган идарә тарафыннан объектларны файдалануга тапшыруга бәйле 824 гариза һәм хәбәрнамә буенча уңай карарлар кабул ителгән. Капиталь объектларны файдалануга тапшыруга 175 рөхсәт, шәхси торак төзелеше категориясе буенча төзелгән объектларның төзелешкә туры килүе турында 644 хәбәрнамә, ясалма җир кишәрлеген файдалануга тапшыруга бер рөхсәт бирелгән, шулай ук мәдәни мирас объектларын саклау буенча башкарылган эшләрне кабул итүгә дүрт акт төзелгән.

Файдалануга тапшырылган социаль әһәмиятле объектлар арасында «Җәй» торак комплексында 1224 урынга исәпләнгән яңа мәктәпне, «33 хәрби шәһәрчек» торак комплексында 220 урынга исәпләнгән балалар бакчасын, «Яз» торак комплексында 400 кешегә исәпләнгән поликлиниканы һәм «Идел киңлекләре» торак комплексында 200 кешегә исәпләнгән балалар поликлиникасын, Салмачы торак массивындагы Жемчужная урамында Гомуми практика табибы һәм педиатр үзәген әйтергә була.

Казанның туристлык потенциалын үстерү өчен 500 урынга исәпләнгән өч яңа кунакханә ачылган. Параллель рәвештә шәһәрдә сәүдә объектларын яңарту һәм үзгәртү эшләре дәвам итә.

Икътисади блокта сәнәгать объектларын сафка бастыру тәмамланган, шулай ук транспорт инфраструктурасын үстерү проектлары гамәлгә ашырылган. Аерым алганда, Туфан Миңнуллин һәм Г.Камал исемендәге театр янындагы Х.Такташ урамнарында автомобиль юлларын төзекләндерү тәмамланган.

Бер ел эчендә Казанда барлыгы 1 310 565 квадрат метр торак файдалануга тапшырылган, шуларның яртысыннан артыгы – шәхси торак йортларга, ә 602 мең квадрат метр тирәсе, социаль ипотека буенча төзелгән торакны да кертеп, күпфатирлы төзелешкә туры килә. Татарстан Республикасында файдалануга тапшырылган барлык торакның 37 проценттан артыгы нәкъ менә төбәк башкаласына туры килә. Әлеге күрсәткеч республикага төзелеш күләме буенча Идел буе федераль округында алдынгы урынны яуларга мөмкинлек биргән.

2026 елга 1,25 миллион квадрат метр мәйдандагы торакны файдалануга тапшыру планы билгеләнгән.

«План шактый киеренке, без аны үтәү өчен барлык ресурсларны эзләячәкбез. Гомумән алганда, хисап елының барлык бурычлары да үтәлде, муниципаль хезмәтләр билгеләнгән вакыт аралыгында сыйфатлы һәм профессиональ рәвештә күрсәтелә, 2026 елда уңышлы эшләүгә өметләнәбез», - дип нәтиҗә ясады идарә башлыгы Марсель Габделхаков.